Ramri humhalh kawngah huaisen takin MNF sorkar a kalzel : MNF

Mizo National Frotn MNF party chuan thuchhuah siamin, “Nikum lama Assam leh Mizoram ramri-a buaina avanga inkahna thlen champha kum khatna a ni a. Nikum 26.7.2021 thil thlengah khan Assam Police 7 laiin nunna an chan a nih kha. He ni lo thleng hi ram leh hnam tana kan ngaihtuahna kan hman tharna ni leh kan inhlan thar niah hmang ila MNF Party chuan a duh tak zet a ni,” an ti.
Thuchhuahah chuan, “March ni 10, 2018 khan ramri humhalh tura penchhuak zirlaite leh chanchinbu mite chu Assam Police-in Zophaiah nasa taka kutthlakin silai-in an kap a. Khatih hunlaia sorkar Congress Party khan Mizo zirlaite thlavang a hauh ngam lo va, mangang takin chhantu nei lovin an awm a nih kha. Tunah erawh chuan Mizo mipuite hmaa ding ngam sorkar kan nei ta hi MNF chuan lawmawm a ti hle a ni.
“Mizoram ramri humhalh tur hian ramri-ah hmasawnna hna thawh a pawimawh zia hriain MNF sorkar chuan theih tawpin hma a la mek zel a. Mizoram ramri hmun hrang hrangah a theih ang angin hmasawnna hna kalpui mek zel a ni.
“Ramri chinfel hna thawk tur hian Mizoram sorkar chuan Deputy Chief Minister Tawnluia Chairman-na hnuaiah Boundary Committee a din a. He Committee-ah hian Mizoram Tlawmngai pawl hrang hrang leh Party zawng zawngte member an ni. He Committee hian thutkhawm vawi engemaw zat nei tawhin Mizoram ramri atana BEFR 1875 ramri chu an pawm a ni.
“Assam nena kan ramri chingfel tur hian chak angin Mizoram sorkar chuan hma a la chhunzawm zel a. Assam sorkar nen pawh level hrang hrangah inbiakna kalpui a lo tawh a. Tunah hian inbiakna nei turin hmalak leh mek a ni a. July ni 7, 2022 khan Assam Border Minister Atul Bora chuan Mizoram Home Minister Lalchamliana rawn biain ramri chungchangah inbiak an duh thu a rawn sawi a. Mizoram Chief Minister Zoramthanga pawh hmaichhanah ngei ramri chungchang sawipui a duh thu Assam Minister Atul Bora hian Mizoram Home Minister hi a hrilh a. Home Minister Lalchamliana chuan rawtna rawn siam tura lo chhangletin, Assam lam thu leh hla hi la ngaihchan zui mek a ni.
“MNF kaihhruai Mizoram sorkar chuan kawng tinrenga Mizo mipuite himna tur leh kan ram chin humhalh turin huaisen takin hma a la mek zel a ni,” an ti.