NAAC-in PUC hnenah Accreditation A+ Grade a pe

India rama zirna in te endiktu, (NAAC) chuan Pachhunga University College chu Accreditation A+ Grade an pe a, Cumulative Grade Point Average (CGPA) 3.37 an hmu a ni.
Pachhunga University College hi July ni 20-21 chhung khan National Assessment and Accreditation Council (NAAC) hian an endik a, tehfung hrang hrang hmanga endik a nih hnuah dinhmun sang tak, A+ Grade pek a ni a. India Hmarchhaka NAAC A+ College pahnih awm-ah a score sang zawk niin, northeast college zinga NAAC grading a score sang ber a ni. Kum 2016-a endik a nih tum khan PUC hi A+ Grade pek a lo ni tawh a, tun tumah hian A+ Grade pek ni leh mah se, hmasawn zel in a hma aiin point an hmu sang zawk a ni.
P.U. College hi Post Graduate College a nih tawh vangin PG College tehfung hmanga teh a ni a. NAAC hian July 2017 khan endikna tehfung thar an hmang a. Tuna an tehfung tharah hian 3.26 – 3.50 CGPA hi A+ Grade a ni a, A++ Grade ni tur chuan 3.51 – 4.00 CGPA hmuh a ngai a. Tun tumah hian PUC hian CGPA 3.37 hmuin point score ah hma a sawn a ni.
He an grade thar hmuh avang hian Principal Prof. H. Lalthanzara chuan thawktute thawhhona that vang a ni tiin Non-teaching staff te, zirtirtu te, zirlai, Alumni leh Parent ten thahnemngai taka College hmasawnna tura an thawhho vang a ni tiin Pathian leh a thawhpuite zawng zawng chungah a lawmthu a sawi a. Grade A+ hmu thei leh CGPA score sang zawk an hmu thei chu lawmawm a tih thu a sawi bawk. PU College IQAC coordinator Dr Henry Lalmawizuala pawhin tun hnai-a college hmasawnna tam tak hmuh tur awm avang leh thawhhona tha tak avanga a lawmthu a sawi bawk a ni.