Hun engemaw chen kal tawh atang khan Social Media kaltlangin uchuak tak taka damdawi fakna hmuh a ni thin a. Hetianga damdawi fak hi dan khap thil a nih bakah, a hmangtu tana thil pawi tak thleng thei a nih avangin FDA Mizoram chuan a theh darhtute hi zawnga umzuiin, hmuhchhuah theihte chu na takin a lo zilh tawh thin a ni.
Tun hnai thlengin natna benvawn neite tan leh a bikin thalaite duhzawng tur damdawi fakna uchuak leh dik lo hmuh tur a la awm ta cheu va. Heng damdawite hi an thatpui takzet em tih chu a hmangtuten an hre ngei tur a ni a, FDA Mizoramin an damdawi fakte nihphung a zir chiannaah erawh a pawi theihna buk a rit daih zawk vek a ni.
ZMC-a ‘Adverse Drugs Reaction Monitoring Centre – Pharmacovigilance Cell’ chuan tunlaia damdawi an fakte hman avanga harsatna nei report tun hnaiah an dawng nual a, heng mite hi Social Media kaltlanga an hmuh Cherna/Ngona damdawi lo hmangtute an ni a, an insawiselna tlangpui chu – lungphu rang(tachycardia), Taksa chauh ngawih ngawihna(fatigue), Chiaina(light headedness), Muthilh theih lohna (insomnia), Ning ngawih ngawiha awm (stress), leh Chawpai nuam lo (indigestion / bloating) te a ni a, a pawi hle a ni.
Chuvangin, tunlaia damdawi fakna darh mek – Lishou : Cherna Damdawi (Sibutramine), Ngona damdawi (Glutathione), Cindella Infusion, Thana (nerve) damdawi, etc. tih zawng zawngte hi doctor hriatpuina awm hauh lo leh sumdawnna thil mai a ni a. A hmangtu tana thil pawi tak thleng thei a nih avangin tuman heng thil hi um a ngaihven lo turin kan inngen a ni. A hlauhawm theihna leh damdawi chanchin hrechiang duh chuan FDA Wing, DHS Office, Old Building, Dinthar-ah emaw ADR Monitoring Centre, ZMC leh Drugs Information Centre, Department of Pharmacy, RIPANS-ahte zawh chian theih reng a ni e.
Heng damdawi fakna thehdarh thintute pawh mihring hriselna tihchhiat vek theihna a nih avangin ti tawh lo tura ngen an ni a, dan bawhchhia manchhuah an awm chuan dan anga hrem an ni ngei dawn a ni.
