Motor tang nam tum chesualin kawngthlangah tlahlum

Tlabunga hna thawka awm R Lalthantluanga, kum 71 mi, Chhipphir khua chu tukin zing dar 8:45 vel khan, an chuanna lirthei tâng nam tuma a chhuk tur chesualin, kawng thlang lamah a tlahlum.
R Lalthantluanga hi an hnathawh chungchang buaipuia Tlabunga zin niin, tukin zing khan an khaw lam pan turin Tlabung an chhuahsan a, Tlabung atanga khaw hnai ber Tuichawng piah deuh hlek, km 3 vela hlaa kawng chhe laiah an chuanna lirthei a tan avangin, nam tuma khualzin dang ruala a chhuk chu chesualin, kawng thlang lam feet 25 vela sangah a tla thla palh ta a ni.
Chetsualna tawk R Lalthangtluanga hi rang takin Tlabung damdawi in panpui ni mah se, a lo insawh nat avangin chhan hman a ni ta lo a, YMA; Tlabung branch-in a kuang siamsakin, nimin chawhnu dar 2:10 vel khan, an khua Chhipphir panpui a ni.
Tlabung leh Lunglei inkalpawhna NH 302 hi tunlai hian a chhiat lehzual avangin, ni tin deuhthaw lirthei eng emaw zat a tan phah bakah, Tlabung atang hian km 97-a hla Lunglei thlen nan darkar 10 thang a ngaih chang te a awm a, nimina chhiatna thlen chhan pawh hi kawng chhiat vangah puh theih a nih thu, Tlabung atanga thudawnna chuan a sawi.