Sum enkawlah Mizoram sorkar a hlawhchham : Lalduhoma

Lalduhoma, MLA, ZPM Leader chuan Khawzawl leh a chhehvel a fang kual mek a, vawiin khan Khawzawl Vengthar leh Chawngtlai Venglaiah vantlang inkhawm a nei a. Tualchhung ZPM hruaitute leh ZPM Gen.Hqrs atangin hruaitu ten an tawiawm a ni.
Lalduhoma, “Tuna kan ram sum leh pai dinhmun kan thlirin sum enkawl chungchangah kan sawrkar hrawn mek hi a hlawhchham chiang hle a. Mizoram sawrkar sum dinhmun a that loh avangin Mizoram sum chevel enkawltu treasury pawhin pawisa a pe chhuak tawh lo a ni tih thute chanchinthar lam atangin kan hre leh zel a, tunah hian khar hial ngai lek lek tawh tihna a ni ber a, a zahthlak hle a ni,” a ti a. “CSS sum Mizoram sawrkarin a changtu tur department hnena pe chhuak duh lovin thil dangah a hmansak thin a, tunah hian kan sum dinhmun a buai em em a, engvangin nge hetiang dinhmunah kan kan din tak mai tih kan ngaihtuah a ngai a, ringtu kan nihna ang pawhin a zahthlak hle a, he thil lo thlen chhan lian ber chu hlemhletna a ni,” a ti bawk.
“Kan ram sum leh pai enkawl tur hian tuna kan Chief Minister hi mipuii hian kan ring ngam tawh lo a. MNF hi pawl ropui tak, ram leh hnam tana thisen pawh hlan ngam an ni. Amaherawhchu, an hotu lu ber avang hian tunah chuan an tlu chhe mek a ni,” a ti a. “MNF-ah hian ram leh hnam hmangaihtu mi thahnem tam tak an awm tih kan hria a, amaherawhchu, an hruaitu berin a zir miau loh avangin an pawlin a tuar a, mi beidawng tam tak an awm tawh a ni,” a ti.
ZPM Leader chuan, “Mizote hi hnam taima leh thuawih tak kan ni a, sawrkarin thlai ching tûra min tih ang chu thuawih takin kan ching zel a, mahse, a market lam a ngaihsak leh si loh avangin kut hnathawktute kan beidawng leh thin a ni. Kan ram hi taima apiang an beidawnna ram, a thar chhuak tam apiangin tih tawih tur an ngahna ramah kan siam ta a ni,” a ti a. “Kan ram tluchhe mek siam tur hian keini hi kan lo pen chhuak ta a, mipuite pawhin min thlawp tha hlein kan hria a ni. Pathian leh mipui zarah kan ram hi siam that ngei kan tum a, kan thei ngei bawk ang,” a ti bawk.