Home Minister-in Mizoram sum leh pai dinhmun a sawi

Aizawl August 1 : Mizo Hnam Runah chhung Inkhawm vawiin khan neih a ni a, he hunah hian Lalchamliana, Minister leh MNF Adviser ni bawk chuan thu sawiin, “Mithenkhat ten kan CM chu Finance Management a thiamloh vangah an puh a, mahse sum leh pai enkawl thiamloh vang a ni lova, kan budget-ah vaibelchhe singkhat sanghnih zahnih sawmkua hi House-ah banpharin kan pass a ni a, State own tax leh non tax revenue atangin kumkhatah za a sawm velin kan pha lo a, State thenkhat chu za a sawmruk deuh thawin an intodelh a, keiniah chuan hailuhna tur kan nei ve lova, Central-ah kan la inghat nasa a ni,” a ti.
Home Minister chuan, “Tax Devolution hi India sawrkarin tax a lak khawm zawng zawng hi tehna fung hrang hrang atangin 0.50 (Duli) vel kan lo chang ve a, thlakhatah vaibelchhe 50 share nei thin kha Covid avangin a tlahniam ta duai duai a.
“Kumin budget vaibelchhe 2646.64 hi CSS atanga kan hmuh tur a ni a. CSS scheme hi hmasawnna tura central-in a state a rawn pek hian state sawrkar sum bawmah rei tak a tang thin hi a tha lo em em a. Tun hma chuan RBI-ah Mizoram hian account neiin State-in a sum kan hmuh hrang hrang kha a lut khawm thin a, kha khan sum kan hmuhna hrang hrangah min chhan a, tunah chuan khang kha a awm tawh loh avangin kan buai ta deuh thin. Amaherawhchu, kan thatna tur a nih te pawh ka ring. External Aided Project (EAP) – ADB/JICA atanga loan lakte hi za a sawmhnih (20%) State, zaa sawmriat (80%) Funding Agency. Hemi atanga zaa sawmkua (90%) hi central in a rulh tur a ni. 14th Finance Commission khan State-ah hian pawisa an pe tha em em a, Congress sawrkar lai khan Pu Sawta kha finance a thiam an ti a. Mahse, a hunlaia a hmuh ang pawisa kha hmu ve ta ila tupawhin an thiam ang,” a ti.
Home minister chuan, “Budget a chuang ve lo, loh theihloh a hman ngai a crore tel kan hmang a, RTPCR khawl leina tur te, Covid avanga sum senna hrang hrang avangin kan hmang nasa em em a, 2600cr tel hi kan hmuh tur ang kan hmu lo bawk a, ramri buai avangin a vaibelchhe tel kan sen a ngai a, mi sang tel kalna leh haw man hi a tam sam em em a ni,” a ti bawk.
Lalchamliana chuan, “Vawk pul hri avangin kan buai em em a, vawk pul neite hnena zangnadawmna pek tur nen a vaibelchhe tel hi a kal ral a, chutiang karah chuan tupawh hi lo sawrkar sela, tun ang system a central-in min kalpuia, keimahni lamah intodelh kan tum loh chuan awlsam aiin harsat lam hi kan pan zel ang. Sawrkar pawh hi mipui telloin a kal thei lo, Kohhran pawh mipui tel loin a kal thei lo, Kohhranah chuan a tam zawk hi mipui tum a ni a, sawrkarah chuan zaa sawm vel kan intum ve tawk a. Political party hruaitute leh mipui pawh hian kan rilru kan thlak a hun tawh. UT kan nih atanga State kan nih thleng hian Central-in min tum sak a la ni a, sorkarin tui/electric bill a han tisang deuh a opposition hoin inti tha fahranin an thlavang an han hauh a. Income tax te hi tlang mite tih loh chuan an pe a, keiniah chuan tribal kan nih avangin Mizoram chhungah kan pe lova, phailama awm chuan an pe ang. Chuvangin, tupawh lo sawrkar sela, politics a inbeihnan kan lo hmang thin hi i sim ang u. Keimahni leh keimahni inchawm zo turin pen khat te te a kan kal a ngai a, central sum ring lo hian kan awm vat ka ring a ni,” a ti.
Home minister chuan, “Engvangin nge Central-in sum min pek a tih hniam tial tial mai chhan hi, tih chuan mahni intodelh ve turin min duh a nih ka ring,” a ti a. “Khawvel pumah Covid avang a kan harsat lai hian tumah hian Financial Management an thiam ka ring lo a, alehlamah sawrkar hnathawk hlawh leh DA te a lo pung zel a, Finance Commission min pek hi tisang leh thei tur chuang an awm lo a. Chuvangin, kan sum leh pai dinhmun hi mahni phak tawk theuhin i zir chiang ang u. Vawiin ni a kan hotute archuk tui lo khawpa sawisa tute hi kan dinhmunah han ding ve ta sela engruai an nih bik hi ka ring lo,” a ti bawk.