Vawiin August ni 6, 2022 (Inrinni) chawhnu dar 1:00pm khan Young Men’s Christian Association ( YMCA) te bul tumin Synod Conference Centre-ah World Peace Day 2022 hman a ni.
He hunah hian inlawmna thu sawitu Mizoram YMCA President leh Minister nib bawk Dr.R.Lalthangliana, chuan Khawvel puma World Peace Day hman țhin anih chhan sawiin Indopui 2-na a USA-in Japan Khawpui Hiroshima Atom bomb hmanga a beihna Ni denchhenin in Khawvelah Remna leh Muanna a awm zel theih nan Remna Ni leh Țawngtaina Ni atan August Ni 6 hi YMCA bul tumin Khawvel hmun hrang hrangah hman thin a ni tih a sawi a. Remna hi a hlu a, kan Lal Isua zirtirna Lungphum pawh Remna leh Hmangaihna a ni tiiin, remna leh muanna a lo awm zel theih nan Pathian hnenah inhlan thar țheuh turin kalkhawmte a sawm a ni.
He huna Khuallian Rev, Zion Varmawia, Vice Chairman, Mizoram Kohhran Hruaitu Committee(MKHC) chuan thusawiin, “Khawvela Kristian Organisation pawimawh tak YMCA-ten Hiroshima-a Atom bomb thlak champhapha August Ni 6 hi Remna Ni atan an hmang thin chu lawmawm a tih thu sawiin, He Ni-ah hian Kan hma hun zel a remna leh muanna siamtu nih tum zel turin inbuatsaih thar leh ila, Mizoram Kohhran Inzawmkhawm pawl MKHC pawhin Remna siam hi thu Laimu pawimawh tak pakhatah a neih a, Mizorama Remna leh Muanna a awm theih nan hun harsa leh khirh tak karahte Remna Palai hna vawi engemawzah a lo thawk tawh thin a ni. Remna siam kawngah hian Pathian ringtute chu kan indahawl tur a ni lo. Ringtu kan nih chuan remna kawng zawngtu nih hi kan tih tur leh Bible-in min zirtir dan a ni.Kan theih tawk theuhah har deuh mahse; Remna siamtu nih tum zel turin YMCA Memberte ka chah duh che u a,” a ti bawk.
YMCA bul tuma World Peace Day hmanna inkhawmah hian Rev Zion Varmawia Vice Chairman MKHC chu khuallian niin Dr.Andrew Ahoto Sema Vice Chairman YMCA(NER) chu Khualzahawm a ni.
YMCA hi June 06,1844 khan London-ah din a ni a, Khawvela thalai pawl lian ber niin, tun dinhmunah Ram 130-ah an inzarpharh a, member inziaklut Maktaduai 40 chuang an awm mek a ni.
