Commonwealth Games, 2022 Birmingham a neih zawh taka India tan ritchawi (weightlifting) 67kg ah gold medal la tu Mizoram thalai Jeremy Lalrinnunga chu vawiin chawhma khan Chief Minister Pu Zoramthanga chuan CM office conference hall-ah kawmna hun a hmanpui.
Chief Minister chuan Mizoram state te tak atanga infiamna khawvelag mi hrang hrang chawimawina dawng tham, India ram leh khawvel pum huapa mi langsar tak tak kan nei thin chu lawmawm a tih thu sawiin, chung zinga Commonwealth Games ah Mizo mi ngei Jeremy Lalrinnunga’n gold medal a la thei chu ropui tiin a lawmpui thu a sawi a. Olympics games thlenga hlawhtlinna a la chan ngei a duhsak thu a hlan a ni.
Chief Minister chuan Jeremy-a chu hlawhtlinna tam zawk a chan zel theih nan nun uluk tlat turin a chah a. Hlawhtlinna chan a chawimawina dawn rualin mimal nun uluk a pawimawh tel thu sawiin, tun hma lam deuhah sports leh thil dang danga kan mi chhuanvawr tak takte thenkhat an nun an uluk tawkloh avanga hnuhhniama an awm tak thin thu a sawi a. Tunlai thangthar zingah erawh an thiamna chawimawi tlak tak tak mai bakah nun mawi tak entawn tlak an nei tel thin chu lawmawm a tih thu a sawi a ni. Chief Minister chuan hun remchang zawkah CWG22 a Mizoram infiammi pahnih – Jeremy Lalrinnunga leh hockey player Lalremsiami te chawimawina hun sawrkarin buatsaih a tum thu a sawi a ni.
Vawiin inkawmna hun tawi hi Sports & Youth Services Minister Pu Robert Romawia Royte chuan a kaihruai a. Jeremy-a chu India rama an beisei san zingah a tel thu sawiin, hmabak tha tak a neih thu leh, ama zarah Mizoramin hmabak eng tak a neih thu a sawi a.
Manpower Development Board Vice-Chairman leh Aizawl West-I bialtu MLA ni bawk Pu Zothantluanga, Tourism ICT & SYS Development Vice Chairman Pu TC Pachhunga, Sports & Youth Services Secretary Dr. Lalrozama te’n thu an sawi bawk.
Sports & Youth Services Department atangin leh a nu leh pa te bakah amah lo train tu coach te bakah Ainawn veng khawtlang hruaitute vawiin programme-ah hian an tel a ni.
Jeremy Lalrinnunga hi he programme neih zawh hian Delhi panin a kal leh nghal a ni.
