Vawiin khan Tourist Lodge, Chaltlangah ZPM Aizawl South-II Block Political Training neih a ni. He hun hi Pu Lalduhoma, Leader; Pu Lalchhuanthanga, MLA; Baryl Vanneihsangi, Councillor leh General Headquarters hruaitu thenkhatten an hmanpui a ni.
Pu Lalduhoma, ZPM Leader chuan, “Kan ram sum harsat chungchang hi nikum lam khan central sawrkarin warning a rawn pe daih tawh a, kan ngaih pawimawh tawk loh avangin tun hun hi kan thleng ta a ni,” a ti. “Pathian leh ram mipui zarah ZPM-in sawrkarna kan chang ve hlauh te a nih chuan corruption control hi kan hna hmasa a ni dawn. Chief Minister thlenga chhui theitu tur Lok Ayukta kan din dawn a ni. Ni 100 chhungin Zoram mipui ten kan politician-te an thlir dan phung hi kan thlak theih kan beisei,” a ti a. “ZPM sawrkâr-ah chuan kalphung thar, mipui sawrkar kan din dawn a, thingtlang khaw tinah Village Development Committee (VDC) din a ni ang a, Rural Development Block tinah Block Development Committee (BDC) kan din bawk ang a, District tinah hmasâwnna ngaihtuahtu tûr District Development Committee (DDC) din a ni bawk ang a, Level hrang hranga Development Committee-te hi an hna thawh dân uluk taka vil tûrin State Monitoring Committee din a ni bawk ang. Mipui sawrkar kan din dawn avangin mipuite aiawh zo committee kan din dawn a ni,” a ti bawk.
Pu Lalchhuanthanga, Aizawl South-II MLA chuan, “Mihring nunah hian kum upa tak nih thlenga inzir tur a awm. Vawiina intuaitharna hun kan hmang thei hi lawmawm ka ti,” a ti a. “MLA fund kan hman dan chungchangah khawtlangten lawmthu min hrilh thin, kei chuan Block leh Unit hrang hrang te chungah lawmthu ka sawi. Kan party hruaitute nen veng hmasawnna duhin kalphung thar a takin kan kalpui tawh a, a hminga MLA ka nihnaah min chawimawi em em a, lawmthu ka sawi a ni. Nakkum 2023 ah inthlan kan hmachhawn dawn a, chutah chuan vawiina lo kal khawmte hian mawhphurhna tam tak kan nei dawn tih a chiang. Kan bial hi party dangte tan bial thim a ni a, kan party tan bial tha tak a ni thung; Congress leh MLA tan chuan a huphurhawm ngawt ang. Kum 2018 ah khan sum chelek lovin kan mamawh dap chawpin, tih theih leh theihloh hriat hmaa intiamna engmah nei lovin kan campaign a. Kan khingpuite a party angin emaw a mimal angin emaw a chhe zawngin sawiloh tur kan ti a, tlawmna nun nen mi rilru hliam hlau takin mi khawngaihna kan dil a, a campaign fair ber kan nih ka ring. Hei hi tunah pawh kan hriatreng ka duh a ni,” a ti.
Dr. KC Lalmalsawmzauva, General Secretary chuan ZPM policy chungchang zirtirna pein kuthnathawktute tana policy kalpui dan tur te, mipui pawisa sawrkar kuta awm enkawl dan tur te, ram hmasawnna atana policy duanlawk chi hrang hrang te a sawifiah a ni.
Vawiin Aizawl South – II Block Political Training hi hun hniha then niin chawhma lam hi Pu Hmingthanzama, Block President-in a kaihruai a. Chawhnu lam hi Pu HD Lallungkhama, Block Adviser-in a kaihruai a. Aizawl South – II Constituency atangin party hruaitu leh party mi thahnem tak an tel a ni.
