Mizoram NGO Coordination Committee leh Mizo mipuite duh dana Tripura a awm mek Bru te Mizoram Electoral Roll aṭanga voter 1074 zet paih an ni ta hi MNF chuan thil chhinchhiah tlak, ram tan mellung pawimawh tak phunnaah a ngai a ni. Hemi kawnga Mizoram sawrkar hmalakna chu chhuanawm a tiin, hma a lakna zel turah sorkar chungah rinna a nghat tlat a ni.
January 2020 khan Ministry of Home Affairs (MHA), Mizoram sorkar, Tripura sorkar leh Bru hruaitute’n Mizoram aṭanga Bru tlan thlate Tripura-a inbengbel turin inremna an ziak a. He inremna tihlawhtling tur hian hma lak mek zel a ni a. He inremna thuthlung kal zelah hian Tripura-a awmhlen tur Bru-te Mizoram Electoral Roll aṭanga paih hna hi thawh mek zel a ni a. Tripura sorkar nen thawh ho ngai a nih bakah voter te duhthlanna thlapa thiltih ngai a nih avangin tih zung zung theih a ni lo a. Chuti chunga Mizoram sorkar-in a theih ang chaka hma a la mek zel hi a lawmawm tak zet a ni.
Kum 1997 October thla aṭanga Mizoram aṭanga Tripura-a Bru pemte dinhmun chinfel chhoh mek zel a ni hi MNF party chuan lawmawm a ti a. Mizoram aṭanga Tripura-a Bru pemte hi MLA leh MP inthlan apiangin an vote thlak dan tur chungchangah harsatna a awm fo ṭhin a, inthlan buaipuitu lam tan pawh harsatna chi hrang hrang a lo thleng tawh thin. Mizo mipui rilrem loh thil thleng pawh sawi tur a lo awm fo tawh thin a ni.
Bru-te dinhmun chinfel a nih theih nan, Mizoram sorkar, Tripura sorkar leh Home Ministry te a huhoin vawi engemaw zat meeting neiin ruahmanna siam alo ni tawh ṭhin a. Mizoram sorkar pawhin Bru te dinhmun hi hriain chak takin hma ala a. Mizoram NGO Coordination Committee leh Mizo mipuite duh dana Tripura-a kum 20 chuang zet awm tawhte chu Mizoram Electoral Roll aṭanga paih mek niin, Hachhek bial aṭangin mi 791, Dampa bial aṭangin mi 48 leh Mamit bial aṭangin mi 235 paih an ni tawh a ni. Mizoram Electoral Roll aṭanga paih tawh zat hi mi 1074 an ni.
Kum 2005 a MNF sorkar lai khan Bru hel pawl, Bru National Liberation Front (BNLF) te chu Mizoram sorkar kutah inpein, khatih laia Home Minister, Pu Tawnluia kutah an silaite an lo tung tawh a. Hemi hnu hian Mizoram sorkar lakah lungawilo hel pawl hrang hrang indin lehin Mizoram sorkar beihna leh pawikhawihna vawi tam tak a thleng nghe nghe a ni. Mizo mipui rilru tinatu thil thleng, theihnghilh harsa tak tak pawh vawi duai lo a awm tawh a ni.
Mizoram sorkarin Bru mipuite dinhmun hria a, Mizo leh Bru inkara buaina leh inhmuhmawhna thleng ṭhinte a chingfel chho mek zel hi MNF party chuan lawmawm a tiin, Pu Zoramthanga kaihhruai MNF sorkar hmalakna hi chhuanawm a ti hle a ni. Remna kawng zawha ram mipuite rilru hre chunga Sawrkarin hma chak taka a la hi lawmawm kan tiin kan thlawp tlat a ni.
