Vawiin hian Hyve Aizawl City Hall-ah Congress Thalai chuan Intuaitharna hun hmangin, MPCC President Pu Lalsawta leh Rev. Lalzuithanga, Ex-Moderator, Synod ten thu an sawi a, Intuaitharna inkhawm hi MPYCC President Dr. Lalmalsawma Nghaka’n a kaihruai a, Rev. LR Colney-in hunserh hmangin a hlan a ni.
Lalsawta chuan, “Vawiinah hian kan ram tlu chhe tur hi keini ai mahin Political party-a awm ve lote’n an vei zawk tih hi ‘challenge’ a tling a ni. Politics-a awmte aia ram veitu an lo pun tak viau chuan vei a lo tul hle a ni, vei loh chi pawh a ni lo,” tiin Mizoram chu vei a ngaih hle thu Congress Thalai Intuaitharnaa kalte hmaah a sawi a.
“Ram roreltu nikhua lohah hi chuan ram hi a him lo a ni. Nangni thalai rualte hi chuan thluaka sum lut ka vei ve lovang, ka kutah chuan sum a him ang, in tih tlat chuan Mizoram kan siamtha thei a ni, tih takzeta kan tih chuan,” Pu Lalsawta chuan a ti a.
Politics-in min chiahpiah nasa lutuk tih sawiin, “Sorkar tha hi han siam thei hlauh ila chuan chhungkaw tin hian mahni hna kan thawk mai ang. Loneitu-in lo-ah hna a thawk mai ang. Tunge Minister tunge CM tih pawh hriat a ngai lovang,” a ti bawk.
Congress Thalai hruaitute chu ram siamtha tura theihna nei tawk an nih thu MPCC President chuan sawiin, “Niminah te niminpiahah te Congress office-ah cheng khat mah hlawh lovin in kal a, chumiin a entir chu ram tana thawh hi in tlin tih a entir a ni. Nge kan han inla muk ve phawt ang in ti dawn? Teuh lo mai, ram tana hnathawk tur thalai rual he ram hian a mamawh a ni,” a ti.
Synod Ex-Moderator Rev. Lalzuithanga’n Congress Thalai Intuaitharnaah hian thu sawiin, “Congress Thalai Intuaitharna mah ni se, hei hi Political Party zawng zawngin hre rawh se. He ramah hian Lal Isua kan dah hmasak loh chuan eng party pawh sorkar se hmabak eng a awm lo, sual kan haw lo a, kan hlawkna tur a nih chuan kan haw lo a ni. Lal Isua kan dah hmasa a nih loh chuan Vantirhkoh Party pawh sorkar se hmabak a eng chuang lo,” a ti a.
Lal Isua kan dah hmasak loh avangin kan hnamin a tawn mek chhiatna chu enin mihring ni se ICU-ah dah a ngaih tur thu a sawi a, “Kan population atanga han en chuan mipa ral chakna hi a nasa hle a ni. Kum 20/30 kal leh zel sela, he ramah hian mipa chi thlahtu tur hi an awm tawh mang lovang, Mizoram hi a population atanga chhutin hmeithai tamna ber state kan ni a, chung zinga thihna tam ber chu zu leh ruihtheihthil kaihhnawih an ni, kum 2020 khan Mizoramah hmeichhia aia mipa 1829 laiin thi an tam zawk a ni,” a ti bawk.
MPYCC President Dr. Lalmalsawma pawhin thu sawiin, “Congress thalaite hi vawiina phur taka kan la function nachhan chu sorkar tha siam kan tum tlat vang a ni,” a ti a.
“Congress sorkar liam ta khan thil tha tam tak kan tih laiin tih fuh lo tam tak kan nei bawk ang tih kan hria a. Ka dik lohnaahte huaisen takin Congress thalaite chu kan insiamtha zel dawn a ni,” a ti a.
Thalai rual mi thiam zawkte ram tana ke an pen chhuah theih nan Congress thalai chuan kawng zau takin a hawng a ni, a ti a.
“Kan insiamthatna tur leh, Sorkar tha kan siam theihna tura thurawn leh zilhna kan mamawh hle tih pawh kan pawm a, Kohhran rawngbawltute, sokar hnathawk te, Mizoram vei tak tak Mizoram mipuite leh, Mizoram Party hrang hrang a ram ve leh sorkar tha duh tute thurawn leh finchhuahna kan welcome tak meuh meuh a ni,” Dr. Lalmalsawma Nghaka, President, MPYCC chuan a ti.
Intuaitharna inkhawm hi chhawng hniha neiin chawhnu lamah MPCC President leh MPYCC Member te ‘interaction’ neiin zawhna leh chhanna hun hman a ni a, zaithiam Cindy Zaithanpuii’n kalkhawmte zaiin a awi a ni.
