Lunglei atanga Tlabung panna kawngpui – National Highway 302 chhe zuallai, Tuichawng leh Sihphirtlang inkar chu harsatna tawk loa lirtheiten an zawh theih tura thawm tha tura a mawhphurtute nawr nan, vawiin atang khan Commercial Vehicle Joint Action Committee : Tlabung-ten Tlabung atanga lirthei chhuak tur leh lut tur an dang tan.
Tlabunga sumdawnna lirthei chi hrang hrang neituten an din pawl 5 inchhunfinna Commercial Vehicle JAC-te hian, an lo ruahman lawk tawh angin nimin zing dar 5:30 atang khan, an khaw daifem Sakuhtui bulah NH 302 chu lirthei luh leh chhuah theih loh turin an dang tan a, vawiin lamah NHIDCL leh kawng siamtu lam aiawhte nen thil awmdan sawi hoin inbe mah se, an lungawina khawp hmuh leh hriat an neih rih loh avangin, he thu buatsaih lai thleng hian kawng an dang chhunzawm zel a ni.
Commercial Vehicle JAC hruaitute chuan, kawng siamtute chu hun rei tak chhung anmahni hriatthiamna nen mipuiten an lo ngaichang tawh thin tih sawiin, an tum tak tak a nih chuan, lirtheiten tang loa tluang taka an zawh theih tur tawka a chhe zuallai ringawt thawm nan, hun a tam thawkhata an hriat thu, an sawi a, tuna an buaipui lai ber – Sihphirtlang leh Tuichawng inkarah nimin thleng pawhin lirthei thahnem tak an la tang tih sawiin, tha zawka thawm that a nih theih nan, pawl hrang hrangin kawng siamtute chu tum tak tak dawr mah se, tawngkam tha bak dawn an nei ngai lo tih an sawi a, kawng dinhmun chu tlanna tlak khawpa ziaawm nia an ngaih hma chuan tuna an hmalakna chhunzawm zel an tum tih an sawi a ni.
Vawiina Commercial Vehicle Joint Action Committee-in kawng an dan chahna hmunah hian, Tlabung police lam eng emaw zat an duty avangin boruak a muanawm hle a, hetih lai hian kawng thawm that phuta lirthei dangtute chuan, tun tuma an hmalaknaah an pawl an inlungrual thu leh, mipui pawhin an thlawp tha hle an hriat thu sawiin, vawiin lamah pawh an hmalakna dodal zawnga chet lak luih tum emaw an awm loh thu, an sawi.
