Chief Minister’in Prime Minister hnenah Mizoram mamawh a thlen

Chief Minister Pu Zoramthanga chuan kum engemawzat liam ta atanga Prime Minister leh
Union Home Minister hrang hrang ten an lo tiam tawh Mizoram State-in All India Services cadre hrang a
neih ve theihna tura chak taka hma lakpui turin Prime Minister Narendra Modi a ngen a.
Mizoram mamawh
thlena New Delhi a cham
mek Mizoram Chief Minister Pu Zoramthanga chuan
nimin khan India Prime
Minister Narendra Modi
chu Parliament Building-a
a office-ah hmuin inkawmna hun an hmang a.
Mizoram mamawh hrang
hrang a thlen te chu Prime
Minister Narendra Modi
hian ngai pawimawhin a tul
anga bawhzui a nih tur thu
a sawi a ni.
Chief Minister
Zoramthanga hian Prime
Minister leh Union Home
Minister hrang hrang ten an
lo tiam tawh thin Mizoram
State-in All India Services
cadre hrang a neih ve
theihna tura hma lakpui
turin Prime Minister a ngen
a. Separate Cadre Mizoramin a neih ve theihna tura
a khawihtu ber Union Secretary hnenah lehkha ziaka,
tihhlawhtlin thuai a nih ngei
theih nan file pawh chak
taka kal tir nghal tura hriattir
turin Prime Minister a ngen
a. Mizoram Sawrkarin Mizo
tawng thiam ngei Chief Secretary a neih theih nana
Sorkar Laipuia ngenna a
lo thlen tawh chungchang
pawh sawipuiin Prime Minister hian a lo bawhzui tur
thu a sawi a ni.
Chief Minister chuan
Mizoram Sawrkar hmalakna pawimawh tak mau
chungchang pawh Prime
Minister hi hrilhin mau
chinna hmun te leh a sawngbawlna hmun (industry) te
chu a thlalak nen chipchiar
takin a sawipui a. Bamboo
link road kawng sial a tulzia
a thlen chu Narendra Modi
hian ngaih pawimawhin a
hlawhtlin ngei theih nan Finance Minister hnenah
sum leh pai sanction-na
turin Head of account siam
tura a hriattir tur thu Zoramthanga hi a lo hrilh a ni.
Myanmar ram buai
avanga Mizorama tlanchhia refugee te tanpui turin
Chief Minister chuan
Prime Minister hi a ngen a,
MNF returnees te tan
Housing Assistance a dilpu bawk a. Prime Minister
chuan a tul anga a lo enzui
tur thu a hrilh a ni.
Hmarchhak State te
bakah Mizoram ramria
Bangladesh leh Myanmara politics boruak pawh
Prime Minister Narendra
Modi nen hian an sawi dun
a. Chief Minister Zoramthanga chuan Prime Minister nena inkawmna tha tak
an hmang thei chu
lawmawm a tih thu sawiin,
meeting an neih dun tawh
zingah a hlawhtling ber pawl
nia a hriat thu a sawi a ni.