Stroke chungchang zirhona Health Minister-in a hmanpui

Health & Family Welfare Department, Mizoram leh Guwahati Neurological Research Centre (GNRC) tangkawp chuan nimin khan Aizawl Civil Hospital Conference Hall ah Stroke enkawl dan chungchang “Continuing Medical Education on managment of stroke” tih thupui hmangin zirhona hun an buatsaih a. Health Minister Dr R.Lalthangliana chu khuallian niin Health & Family Welfare Board Vice Chairman Dr ZR Thiamsanga chu khual zahawm a ni.
Khuallian Dr.R.Lalthangliana chuan stroke hi tunlai khawvelah buaipui tham a tling lehzual ta a, Mizoram mai ni lo khawvel hmun hrang hrangah stroke avanga harsatna tawk an tam hle a, hmanlai chuan a vei tam zawk hi kum upa lam an ni thin a, tunlaiah erawh chuan kum naupang tak tak stroke an tam ta hle, a ti a. Stroke hian thihna a thlen em loh pawhin a damchhuak te hian taksaah leh rilru lamah harsatna tam tak an tawk a, nunphung pangngai a nung zui thei ta lo tam tak an awm thin a, chuvangin stroke laka kan inven a, a inenkawl dan kan thiam a pawimawh em em a ni, a ti. Health Minister chuan GNRC atanga doctor thiam rual lo kal te chungah lawmthu sawiin Mizoram nen thawhhopui chhunzawm zelah a sawm a. Zirhona huna tel doctor rual te hnenah mipuite zirtirtu an nih hria a, an thil zirchhuahte mipuite hnena thehdarhtuah tang turin a chah a ni.
Dr ZR. Thiamsanga pawhin GNRC atanga mi thiam rual lo kal te hnenah lawmthu sawiin Mizoram tan malsawmna thlen tu an nih ngei a beisei thu a sawi a. Mizoram dung leh vang atanga chhimtu doctor rual ten stroke laka invenna leh enkawlna kawngah hma an sawnpui ngei a beisei thu a sawi.
Programme, Dr T Lalhmangaihi, Principal Director, Health & Family Welfare Department kaihhruaiah hian, GNRC atanga mithiam lo kal Dr Amit Ranjan Barua, Dr Krishna Chandra Narzary leh Dr Firdaus Ahmed te chuan thupui thlan bik hmangin zirtirna an pe a. He programme hi live in youtube kaltlanga pekchhuah a nih bakah Mizoram hmun dang atanga doctor rual ten an chhim ve theihna turin google meet hmanga pekchhuah a ni bawk. Mizoram Sawrkar hnuaia doctor thawk lai te bakah Indian Medical Association member te pawh he programme ah hian an tel a ni.