Thudik tawk lo sawiah Ind. MLA leh eptu MLA te puh

MNF party chuan thuchhuah siamin, “Independent MLA, Dr. Vanlalthlana’n August ni 8, 2022-ah ZPM office-ah Mizoram sorkarin covid do nan sum seng tlem lutuk anga a puangzar kha dawt hmanga mipui hruaikawina tur hmanruaah MNF chuan a ngai a. Chanchinbu thenkhatah phei chuan covid do nan Dr. Vanlalthlana thusawi kha la chhawngin state budget atanga cheng khat pawh hmang lo anga chhuah a ni hial kha MNF chuan pawi a tiin hriatthiam harsa a ti takzet a ni,” an ti.
Vawiina thuchhuahah chuan, “Hripui leng do nan hian kum 2020- 2021 inkarah khan .30 % state budget atanga sen a ni a, hei hi cheng vbc 30 chuang lai a ni. Kum 2021-2022 inkarah .64% covid do nan hman a ni a, chu chu cheng vbc 70 chuang lai a ni bawk.
“Covid-in nasa takin min nuai a, khaw chhak lamah lir a nghing reng a, chhim lamah ram a kang a, ramri a buai a, khawchhak lam unau raltlante lo dawn sawn a ngai a. Budget a dah lawk miah loh sum tam tak senral a ngai a, heti chunga Treasury khar lova vawiin thlenga kan la awm thei hi Pu Zoramthanga, Chief Minister kaihhruai sorkar hi financial management-ah a thiam hleah MNF chuan a ngai a ni.
“Hripui leng avang hian India ram mai ni lo, khawvel pumin harsatna a tawh avangin Mizoram sorkar pawhin central atanga a sum hmuh tur cheng vbc 2000 chuang lai a hmu lo a. Hetianga harsatna sum leh paiah kan tawh lai pawhin sorkar hnathawk hlawh la lo pawh an awm lo leh mipui mamawh zualpui nghei lova vawiin thlenga kan kal thei hi MNF chuan ropui a ti takzet a. Sum leh pai enkawl kawngah kan Chief Minister, Finance Minister ni bawk Pu Zoramthanga remhriatna leh thawhrimzia lannaah MNF chuan a ngai a ni. State budget piah lamah covid do nan Health Minister, Dr.R. Lalthangliana’n ICMR, Government of India atang te, foreign atang te, donation hrang hrang a sawi chhuak thei kha MNF chuan ropui kan tiin kan chhuak hle bawk a ni.
“Eptu MLA-te leh Independent MLA thenkhat hian thudik tawklo hmanga mipui rilru hruaikawi tuma thu an sawi fo hi MNF chuan sim tawh turin a chah nghal bawk a ni.
“Thianghlim leh tha bera insawi thin, ‘Kohhran kan unit’ ti hiala insawi thin, ZPM party chhuanvawr Dr. Vanlalthlana’n thudik tawklo vai vir a, ngaihdan diklo hmanga mipui hruaikawi tuma thu a sawi chiam hi MNF chuan pawi kan ti a, sim se kan duh takzet a ni,” an ti bawk.