Mizoram in International Tourism Mart 2022 a thlen tur ngaihtuahin CM hovin thukhawm

Aizawl August 11 : Mizoram in International Tourism Mart 2022, Nov. ni 2- 4, 2022 chhunga a thlen tur chungchang ngaihtuahin vawiin khan Chief Minister Zoramthanga hovin Organising Committee an thukhawm. Chief Minister hova thutkhawmna hun neihah hian Tourism Minister Robert Romawia Royte leh Mizoram Sorkar Department hotu lu te, NGO hruaitute leh Tourism Department a thawktute an tel a ni.
Chief Minister Zoramthanga chuan Union Ministry of Tourism leh Mizoram Tourism department tangkawpin an buatsaih tur, ‘International Tourism Mart’ chu khualzinte hipna a tana programme pawimawh tak a ni tih a sawi a, a hlawhtlin nan sorkar hmalakna chauh ni lo mipui tawiawmna a pawimawh tak zet a ni a ti a. Khawvel hmun hrang hrang atanga Tourism Industry a zin mite buaipuitu Tour Operator leh Travel Agent te lo fuankhawm tur hi Mizoram Tourism Industry atan a pawimawh zia leh hun bik chhinchhiah tlak a nih zia sawiin, Chief Minister chuan Sorkar department zawng zawng mai ni lova a ram pumpui tanho a tul zia a sawi.
He thutkhawmna-ah hian Chief Minister remtihnain a tul anga pawisa hman lailawk hman ni se tih pawm tlan a ni a. International Tourism Mart buatsaih nana sum sen te hi Union Ministry-ah reimbursement a tih leh theih dawn a ni.
Tourism Minister Robert Romawia Royte chuan he International Tourism Mart, NE State a Tourism hmasawnna tura a bik taka Ministry of Tourism, Govt of India in a duan, kum 2013 atanga a lo buatsaih tan, kum tina NE State ten a inchhawka an thlen thin chu a hlut zia leh a pawimawh zia sawiin Mizoramin a vawikhatna atan a thleng ve thei tur chu lawmawm a tih thu a sawi a. He ITM hi tha tak leh hlawhtling taka kan buatsaih chuan khawvel ram zau zawkah Mizoram Tourism phochhuahna hun tha leh remchang a ni a, nasa taka hma kan sawn phahna tur a nih thu a sawi a. Mipuiten tha taka min lo dawnsawn pui turin a sawm a, khualzinte laka hawihhawm tur leh tanpuitu ni turin a ngen bawk. Khawvelin hun harsa tak a tawng a, Mizoram pawh Covid Pandemic vanga harsatna tamtakin a tlakbuak laia Mizoram Tourism in theih ang anga ke a pen ve zel leh hma a sawn zel chu Sorkar hotute leh Tourism Department a thawktute, Department hrang hrang min tanpui thintute leh Zoram mipui te vang a nih thu a sawi bawk.
ITM hi kum 2021-ah Nagaland ah an lo nghat tawh a, tunkum hi a vawi 9 na tur niin Mizoram hi NE state zinga la thlenglo awm chhun kan ni a. ITM atana Mizoram sorkar inbuatsaihna kal zelah organising sub committee peng hrang hrang 12 lai a awm a ni.