Chief Minister Pu Zoramthanga chuan vawiin khan Mizoram Kohhran Hruaitute Committee (MKHC) kum 40 tlinna Ruby Jubilee, Synod Conference Centre-a buatsaih chu a telpui.
Chief Minister chuan MKHC in kum sawmli chhunga ram tana thahnemngai taka thawka, member te inpe taka hma an la thin chu fakawm a tih thu sawiin a lawmpui thu a hrilh a. Mizoramin hun khirh tak a tawn laiin remna a awm theih nan mipui mangang thlabarte thalmuanna hna thawkin, Zoram Kohhran Hruaitute Committee a lo din tak dan a sawi a. Chief Minister chuan remna a awm theih nan a sipai leh India sawrkar te bia a, Mizorama sipai leh sawrkar hotute nen inbia harsatna hrang hrang kara hma an lakna te a sawi a. Zirlai pawl te, tlawmngai pawl te, political party angin leh pawl hrang hrangin remna atan hma la hlawm mahse, Zoram Kohhran Hruaitute Committee te hmalakna chu lamtang neilo a puitling taka innghah ber nia an hriat avanga an innghahna lian tak a nih thu a sawi a. India sawrkar pawhin a ngaihpawimawh thu a sawi a. Chief Minister chuan mi thahnemngai tak takte tang taka hmalak zarah Mizoramin remna leh muanna tluangtling a neih tak hi midang tan, ram dang hnam dang tana malsawmna kan nih leh chhawnna tur zawk a nih thu a sawi a. Kan bul velah rambuai engemawzat a la awm thu sawiin, mziroamin kan neih ang remna hi an duh ve thu leh, chu remna thu puangchhuak tru chuan keini pawh kan inbuatsaih a tul a ni, a ti. Mizoram chu tlinglo leh thalo nia inhriain keimahni leh keimahni insawisel fo thin mah ila, pawnlam atanga min rawn thlirtute chuan mawi leh entawntlak taka min hmuh fo thin thu a sawi bawk. Mahni tlinlohna chauh hmu lian lo a, kan thatna te, kan theihna te tangkaia hmang zawk tur kan nih thu a sawi a ni.
Vawiin programme hi Rev. Zion Varmawia Fanchun, MKHC Vice Chairman chuan kaihruaiin, Ruby Jubilee Souvenir tlangzarhna neih a ni a. An Secretary Rev. R. Lalrinsanga hnen atangin report ngaihthlak a ni. August ni 13, 1982 khan Zoram Kohhran Hruaitute Committee (ZKHC) tia din niin, April ni 2, 1998 khan Mizoram Kohhran Hruaitute Committee (MKHC) tia thlak a ni a. Report-ah hian remna leh muanna Mizoramah a awm theih nana hma an laka tha an thawh dan report kimchang tak ngaihthlak ni. MKHC Chairman Rev. Dr. Vanlalnghaka chuan thu a sawi bawk a. Hruaitu hlui thenkhat atangin thusawi ngaihthlak ni bawkin, MKHC Vice-Chairman Rev. R. Lalrintluanga chuan lawmthu sawina hun a nei bawk.
