PRESS STATEMENT OF LALRINDIKA RALTE
MLA, HACHHEK CONSTITUENCY
Dated Aizawl 13th August, 2022
August 12, 2022-a Mizoram sorkar Press Release No. 1576/2022-2023 ah Luangpawl, Mamit chu 4th IR Battalion Headquarters anga tarlangin, Battalion Raising Day lawmna neih a nih thu a lo lang a. He thu hian min thawng hle a ni.
Mizoram sorkar hian 4th IR Battalion headquarters atan ka bial chhung, Hachhek Constituency a mi Rengdil hi official-in a puang tawh a, a hmunhma tur pawh mi tlawmngaiten a thlawnin an ram an lo pe tawh a ni. Building-te pawh sain, hmalakna engemaw chen Mizoram sorkarin a kalpui tawh a. Tunah hian sipai pawh engemawzat an awm mek a ni. Tin, August 3, 2013 khan 4th IR Battalion Headquarters lungphum pawh Rengdil-ah ngei hian khatih laia Home Minister Pu R. Lalzirliana’n a lo phum tawh nghe nghe a. Lungphumna hunah hian a hunlaia Hachhek bialtu MLA, Pu Lalrinmawia Ralte, Hon’ble Parliamentary Secretary, Home pawh a tel bawk a ni.
Mizoram sorkarin 4th IR Battalion Headquarters atana ka bial chhunga mi Rengdil a puan fel vek tawh hnua tunhnaia sorkar Press Release meuha Luangpawl, Mamit anga puan a ni leh ta mai hi tih sual palh a nih ka ring a. Sorkar thuchhuah hi Hachhek bial mipuite leh tlawmngaia a thlawn a ram petute rilru na taka siam theihna a ni a. Chuvangin, sorkar Press Release hi a tihdikna mipui hriata puangchhuak turin Mizoram sorkar ka ngen a. Chutiang ni lo a, mipui hriat loha sorkarin 4th IR Battalion Headquarters chungchanga thutlukna dang a lo siam leh a nih pawhin zep lo a Mizoram mipui hma a thudik puangchhuak turin Mizoram sorkar ka ngen bawk a ni.
Sd/-
LALRINDIKA RALTE
MLA
I – Hachhek AC (ST)
