Aizawl, 15th August, 2022 : India Independence Day vawi 76-na chu vawiin khan India ram hmun dangte rualin Aizawl Lammual-ah ropui taka lawm a ni a. Khuallian Pu Zoramthanga Chief Minister-in zing dar 8:00a.m ah India Hnam Puanzar pawt pharhin Parade Contingent 28 te chibai a chhang let a.
Chief Minister chuan India ram hmun hrang hranga Independence Day lawmtute leh Mizoram mipuite chibai bukin duhsakna a hlan a. Kumin Independence Day hi India ramin zalenna a hmuh champha vawi 75-na a nih angin a lawmna Azadi Ka Amrit Mahotsav pualin sawrkar department hrang hrang ten programme an buatsaih a ni tih sawiin he ‘Year of Amrit Festival of Independence’ hi mipuite thinlungah ram tana inhlan thar lehna thlentu ni se a duh thu a sawi a. Hruaitu hmasate inpekna leh India ram tana an inhlanna hlutzia hre rengin anmahni zahna lantira, an hnathawhte chhunzawm turin mipuite chu theihtawp chhuah turin a sawm a ni.
Vawiina Independence Day lawmna ah hian Armed Contingent 7, Unarmed Contingent 4 leh School Contingent 14 bakah Band Party 3 an tel a. Khuallian Pu Zoramthanga chuan ram hmasawnna atana sawrkar hmalakna hrang hrangte tarlangin hetiang hian Independence Day lawmna ah hian thu a sawi a ni:
1. State chhung a ralmuan a, him leh thlamuang taka mipuite kan awm theih nan venhimna kawngah nasa taka hma lak chhunzawm a ni a. Mizoram Police te thawhrimna zarah kum kal ta chhung khan pawikhawihna lian tham a thleng lo a; thubuai (criminal case) thehluh 1,633 zinga 676 chu hlawhlting takin chin fel a ni a, silai tawlh ruk tum mi 20 manin thubuai 12 ziah luh a ni bawk.
Kum 2021-2022 chhungin SEDP hnuaiah Mizoram-Assam ramri-a sipai te riahna tur (barrack) sak a ni a. Special Assistance to State for Capital Expenditure Scheme hnuaiah 3rd IR Bn. Hqrs, Thingkah, Lawngtlai District-ah tui thianghlim in tur pekna tur cheng vaibelchhe 6.90 ruahman a ni a, sum hi hnathawktu tur PHE Department kutah hlan a ni tawh a ni.
2. Kum kalta chhung khan Public Works Department chuan National Highway 54 Khamrang-Kawnpui, Khamrang— Buichali leh Bilkhawthlir-Kolasib thawmthat hna a thawk a. COVID-19 hripui leng karah pawh PWD chuan hna chi hrang hrang kawngpui laih, alkatra-a luan leh cement concrete hmanga kawngpui siam hnate Mizoram chhung hmun hrang hrangah a thawk a. NESIDS, NABARD, NEC, STATE, SPA, SEDP, NEDP & CSS project hmangin Sawrkar Office Building, Staff Quarters, Airport, College Building, Primary Health Centre, High Court, Market Shed leh Car Parking sak hna te thawh a ni a. Lengpui Airport Terminal Building sak mek pawh hna 78% thawh zawh tawh niin, Airport a kawng chhawng sak mek chu hna 43% thawh zawh tawh a ni. Lunglei Zohnuai Vengah District Science Centre chu peih fel a ni tawh a. Digital Planetarium sak mek pawh 98% zawh fel tawh a ni a, rei lo teah hawn theih beisei a ni.
3. Power & Electricity Department hnuaiah Special Central Assistance to State for Capital Expenditure hnuaia sum hmuh cheng nuai sangkhat zaruk sawmkua (Rs. 1,690 lakh) hmangin Lunglei Kawmzawl-ah Sub-Station thar sak zawh a ni a, he Sub-Station hian Lunglei, Lawngtlai leh Saha District-te kawlphetha in a chawm a ni. SEDP pawisa cheng nuai 795.76 hmangin East Lungdar-ah Sub-Station thar sak a nih bakah Bukpui-Khawzawl Line thawmthat a ni bawk a, hei hian Champhai, Khawzawl leh Saitual District-te tan power supply chungchangah an mamawh dan azirin line duhthlan tur dang a pe dawn a ni. Maumual-a Sub-Station tunhnaia sak zawh tak pawhin Aizawl khawpui laili chawmtu Zuangtui Indoor Sub-Station a tihchak leh zual beisei a ni.
4. Public Health Engineering Department chuan Jal Jeevan Mission hnuaiah kum 2020-2022 chhung khan thingtlang mihring chenna (rural household) 1,34,028 awm zat atanga 85,231 hnenah tui connection “Functional House Tap Connection” (FHTC) an pe fel tawh a, thingtlang khaw 177 an tuam chhuak tawh a ni. Khawpui (urban areas) ah tui connection 1,13,800 pekchhuah tawh a ni bawk.
5. Mizoram sawrkar chuan medical reimbursement dil ve thei lo chhungkuate tan Mizoram State Health Care Scheme dinin health insurance a ruahman sak a, kum 2021-2022 chhungin chhungkaw 2,00,122 an inziak lut a ni. DoNER Ministry hnuaia NESIDS kallangin Kolasib District Hospital, khum 100 awmna tur chu cheng nuai 2,200 senga sak hna tan turin inbuatsaih mek a ni a. Mizoram sawrkar chuan Power Grid Corporation India Limited nen MoU ziakin khum 100 dahna tur, Serchhip District Hospital sak tum a ni.
Zoram Medical College pawh tluang takin a kal zel a, zirlaiten exam an hmachhawn tawhah an titha hle thin a ni. ZMC-ah hian Academic building leh Hospital Building sak zawh tep a awm a. NESIDS sum cheng vaibelchhe 20, mipa hostel leh hmeichhe hostel (Residential Hostels for Ladies and Gents) sakna tur hmuh a ni tawh bawk a ni.
6. Sub-Mission on Agriculture Mechanization hnuaiah Annual Action Plan siamin kut hnathawktuten man tlawm zawka (subsidy) tractor leh hmanraw dangte an lei theih nan ruahmanna siam a ni a. FOCUS kaltlangin Mizoram chhunga loneitu chhungkaw 64,500 te sum lak luh tihpunna tur leh, sik leh sa inthlak vanga harsatna tawk lova thlai an thar chhuah reng theih nan kawng hrang hrangin hma lak a ni a. Buh leh thlai eichhetu hrik dona kawnga hmasawn leh zual nan Lengpui-ah cheng nuai 273 sengin Biological Control Laboratory sak mek a ni bawk.
7. Horticulture hnuaiah district hrang hrang atangin tomato metric ton 1,150 thar chhuah tawh a ni a, tomato thar hun a nih avangin hei hi la pun belh ngei tura ngaih a ni a. Tualte Tomato Growers’ Co-operative Society Ltd. chuan Assam lamah tomato 500 qtls an hralh chhuak tawh nghe nghe a, SEDP kaltlangin Tualte ah hian Tomato storage and packing unit din tum a ni a, hemi atan hian sum cheng nuai 50 pek chhuah tawh a ni. Mizoramin tomato kan thar chhuah tam lehzual theih nan district tinah hmalakna thar ‘Operation Tomato’ kalpui mek a ni bawk. Dawnfawh tharchhuah kawngah pawh nasa takin Horticulture Department hian tan a la zel a, tunah hian Dawnfawh chi hrang hrang – Ichiban, Africana and Madhuri te chu district tinah chin mek a ni.
Mizoram chhung bakah Mizoram pawna hralh chhuah tham nei turin Dragon Fruit thar chhuah kawngah hma lak a ni a, cluster expansion kalpui mek a ni. A chingtuten man man zawka an hralh theih nan, a hralhna tur ngaihtuah sak turin MIZOFED nen thawhho a ni a. Khawzawl, Serchhip, Mamit, Lawngtlai leh Aizawl District-ah uar zawka lakhuihthei chinna kalpui a ni a. Kumin June thla khan thlai leh theirah thar chhuah kawnga Mizoram hmasawnna tarlanna “Horticulture Fair” chu hlawhtling takin Aijal Club Park, Aizawlah neih a ni.
8. COVID-19 hripui leng vangin kum hmasa lam khan sangha kan thar chhuah zat 38% laiin a tlahniam hman a, boruak a ziaawm tak hnu hian Fisheries Department in theihtawp chhuahin hma an han la a, tunah chuan hma sawn chho ve leh tawhin Mizoramin sangha a thar chhuah zat pawh 6% in a pung chho leh ta a ni. Sangha chi a kan intodelhlohna phuhru turin sangha chi tharchhuahna tur Fish Hatchery 6 hmun pawimawh laiah kan din dawn a, Mizoram chhungah beneficiary engemawzat thlang chhuakin sangha chi tihpunna tur dil hectare 50 a zau siam tum a ni. Ram chhunga sangha mantuten an hlawkpui theih nan HEP reservoir hrang hranga sangha note nuai 45 dah a ni dawn bawk a ni.
9. African Swine Fever avanga kum 2021 chhunga vawk suat ngai chu 12,568 lai mai a ni a, a vanduaithlak tak zet a ni. Sawrkar laipuia Ministry of Fisheries, Animal Husbandry & Dairying hnuaia Assistance to States for Control of Animal Diseases (ASCAD) hnen atangin heng vawk hrileng avanga suat ngai te compensate nan hian ASCAD hnuaiah Rs.584.97 lakhs hmuh a ni. Kaihhruaina angin state sawrkarin 50:50 in a lo dawm ve bawk a ni. ASF avanga an vawk suat ngai, mi 2,488 hnenah Direct benefit Transfer in tanpuina sum hi pek a ni ang a, a vaiin cheng nuai 1,169.94 pek tur a ni.
10. MGNREGA hnuaiah chhungkua 2,08,829 hnenah Job Card pek niin sawrkar kum 2021-2022 chhung khan an zavai tan hnathawhna siam a ni a. Vawiin thleng hian thingtlanga Job Card holder-te tan chawhrualin ni 23.13 chhung inhlawhna siam a ni tawh a, Rural Development department chuan sawrkar kum 2022-23 tawpah hi chuan ni 100 chhung inhlawhna siam ngei a tum a ni. PMAY-G hnuaia beneficiary 6,600 te insak tanpuina sum pek chhuah a ni tawh a ni.
Sawrkar kum 2020-21 atan khan ramri dep RD block 15 chhunga hmasawnna hna hrang hrang 178 atan cheng nuai 2,731 ruahmanna siam a ni a, June ni 14, 2022 khan Ministry of Home Affairs chuan hemi atan hian sum a rawn pe chhuak kim tawh a ni.
11. Food, Civil Supplies & Consumer Affairs Department chuan Public Distribution System (PDS) hnuaiah chhungkaw 11,23,340 (June, 2022 allotment angin) hnenah buhfai sem hna a thawk a. Fur ruahtui tam laia thingtlang hmun kilkhawr zawka buhfai sem a khaihlak loh nan Supply Centre 79 ah buhfai stock thahnem tak dah a ni hlawm a. PDS kalpui that avangin vawiin thleng hian ei tur tlakchham avanga nunna chan an awm hriat a ni lo va. PM-GKAY hnuaiah COVID-19 hrileng avanga eitur tlachham an awm loh nan NFSA beneficiary harsatna tawkte hnenah mi pakhat tan buhfai kg 1 zel thla tin pek a ni a, he hmalakna hi September 2022 thleng kalpui a ni ang.
12. Birmingham, United Kingdom a Commonwealth Games 2022 neih zawh tak ah India ram aiawhin weightlifting 67 kg category ah Mizo tlangval Jeremy Lalrinnunga chuan Gold Medal la in, record a siam nghe nghe a. India Hockey Team a tel Mizo nula Lalremsiami pawhin Bronze Medal a rawn hawn bawk a. Ram pawn infiamna khawvela mahni hming chher a, Mizoram ti hmingthatu thlalai chhuanawm tak tak kan nei zel hi a lawmawm tak zet a. Mizoram sawrkar chuan heng infiammi 2 te hi a theih ang angin chawimawina pek zel a tum a ni.
Mizoram State Sports Council chuan Rural Electrification Corporation nen thawk dunin state chhunga Motorspots Race Track hmasa ber tur Lengpui ah hma a la mek a. Cheng vaibelchhe 10 senga siam zawh tura ruahman niin nakum a zawh hman beisei a ni. Sawrkar laipui Ministry of Tribal Affairs chuan Diakkawn, Kolasib a Futsal playground leh Basketball field siamna tur bakah Vaipuanpho a adventure sports atana State Training Centre dinna tur a rawn tum dawn a ni.
13. Siaha leh Lawngtlai-ah District Transport Office building thar sak zawh niin, kumin October thla hian Kanhmun a Enforcement Check Gate sak mek chu zawh beisei a ni. Tlabung, Serchhip leh Vairengte a Commercial Vehicle Terminal sak leh Govt. Mizo High School, Aizawl Multipurpose Hall sak pawh ngawrh taka kalpui mek niin, kumin chhung hian zawh beisei a ni.
May ni 10, 2022 khan Behliangchhip (Tripura) leh Aizawl inkarah Inter state MST Bus Service chu a vawi khatna atan tlan tan tir a ni a. MST Bus sawm pathum (13) lei belh a service tir a ni bawk.
14. Samagra Shiksha hnuaiah zirlai hmeichhia 43,749 leh zirlai mipa 47,086 hnenah a thlawnin school uniform pek a ni a. Zirlai 99,492 hnenah a thlawnin textbook (Braille lehkhabu telin) pek a ni bawk. Middle School pali (4), High School pali (4) leh Higher Secondary School pahnih (2) upgrade a ni a. Heng bakah hian school 64 ah electric connection pek niin, hmun 37 ah tui thianghlim in tur siamsak a ni a; zun in 192 leh pianphunga rualbanlo zirlaite tan ramp/handrail 25 siam hna te thawh a ni bawk. High School 37 ah leh Higher Secondary School 15 ah zirlai naupang 6,493 tan Vocational Education kalpui a ni a. Elementary School 547 leh High School & Secondary School 270 ah Sanitary Napkin Vending Machine leh Incinerator dah a ni bawk.
15. Higher & Technical Education Department in zirna tih hmasawnna tura kawng hrang hranga hma a lakna in rah duhawm tak a chhuah zel a. Tunah hian College leh zirna in sang kan neih zinga 92% chu National Accreditation and Assessment Council (NAAC) in a endik tawh a, kuminah hian Government Serchhip College leh Government Zirtiri Residential Science College, Durtlang Leitan chuan Grade ‘A’ an hmu tawh nghe nghe a ni.
16. Planning & Programme Implementation Department hnuaiah chhungkaw hmasawnna tur lam hawi zawngin SEDP hnuaiah ruahmanna siam a ni a, he ruahmanna ang hian MLA Constituency tinah beneficiary 1,500 awmin beneficiary zawng zawng hi chhungkaw 60,000 an ni dawn a ni. He scheme hnuaiah hian beneficiary te chu an eizawnna duhthlan ah bul tanna tur cheng sing nga (Rs. 50,000/-) pek an ni dawn a. A enkawltu department 9 te chu beneficiary an neih zat azirin, he programme kalpui nan hian a vaiin sum vaibelchhe 328.13 ruahman a ni.
17. Commerce & Industries Department chuan SEDP hnuaiah puantaha eizawng mi 438 hnenah tanpuina cheng nuai zahnih sawmruk (Rs. 260 lakhs) a pe chhuak tawh a. Ministry of DoNER leh NEC hnuaiah Council Vaih, Siaha ah Mara Handloom & Weaving Centre din tum a ni a; Special Development Project hnuaiah Phuaibuanga Handloom Training cum Production Centre leh Lengpuia Handloom & Handicraft Residential Training Centre din hna thawh mek a ni bawk.
Mizoram Market (Regulation Facilitation) Act, 2021 chu March ni 13, 2022 khan Mizoram Gazette ah chhuah a ni a. Kumin April thla khan Bangladesh Minister of Commerce Pu Tipu Munshi, Mizoram tlawh a rawn zin nen Mizoram leh Bangladesh inkara sumdawnna tih hmasawnna turin Joint Statement ziah a ni.
18. Land Revenue & Settlement Department chuan chak zawk leh langtlang taka lei man, chhiah leh sum khawn a nih theih nan te, ram chungchanga felfai zawka survey leh allotment siam a nih theih nan te ngawrh taka thawkin, a zau thei ang bera mipui thawhpuiin hma a la thin a. Ram awl chhinchhiah a mapping, plotting leh planning hna thawh te, Registration office digitise hna te thawh a ni a.
19. Sawrkar Laipui Ministry of Social Justice & Empowerment hnuaia Nasha Mukt Bharat Abhiyaan (Drug Free India Campaign) chu Social Welfare & Tribal Affairs Department chuan Aizawl, Champhai leh Kolasib District-ah te a kalpui a. He Campaign hnuaiah vek hian Drug Demand Reduction Programme hmangin drug hmansual a hluar zel loh nan leh ruihhlo ngaiten enkawlna tha an dawn a, damna an lo chan theih nan Mizoram chhungah zau takin hma lak a ni.
20. Tourism lama hmasawnna atan Khamrangah eco-tourism tih changtlunna turin Mizoram Sawrkar chuan sum nuai 800 a hmu a. Responsible Tourism Policy kalpui mek chu mirethei zawkte hamthatna tur tinzawnin, ram chhung dehchhuah hlutna tisang a, mi tam tak eizawnna siamsaktu, hmasawnna ngelnghet leh ram chhung mipuite khawsakna dinhmun chawikang thei tura beisei ni. Kumin November thlaa International Tourism Mart Mizoram-a neih tur hian nasa takin Mizoram Tourism pawh a chawikan beisei a ni.
21. GAD, Aviation Wing chuan regional connectivity-ah Union Minister, Civil Aviation hnen atangin kumin March thla khan Most Pro-Active State Award an dawng a. Shillong, Guwahati leh Agartala te bakah Aizawl-Mumbai(via Kolkota) ah te thlawhna direct service siam thar a ni
22. Information & Public Relations Department chuan lemziak mite, film siamtute leh thlalatute tan online programme vawi 5 leh offline programme vawi 4 a buatsaih sak a. Film siamtu mi 32 hnenah short film leh documentary siamna tur sumfaia tanpuina pek a ni. Mizoram Journalists Association member te leh an chhungte tan damdawi ina inenkawlna cheng nuai 20 pek chhuah a ni a. NEC sum hmanga sak Lianchhiari Run sak hna chu 80% vel thawh zawh a ni tawh. I&PR officer pasarih leh journalist pasarih te chu Parliamentary Research & Training Institute for Democracies, Parliament, New Delhi-ah Parliamentary Processes & Prodecureas for Media Persons training tura tirh an ni.
Chief Minister chuan Mizoram hi ram nuam leh ralmuang, ram chhuanawm a siam turin inlungrual a, theihtawp chhuah turin Zoram mipui zawng zawng te a ngen a. Boruak tha lo leh ralmuang lo hnuaiah chuan ramin hma a sawn thei lo tih hre rengin remna leh muanna vawnghim a, harsatna lo awm apiangte pawh inlungruala hmachhawn a, hneh zel tura rilru insiam thar chungin Mizoram tan theihtawp chhuah zel turin a sawm bawk a ni.
