Vawiin ni 17th August, 2022 (Nilaini) chhun dar 12 khan North East India state hrang hrang zirlai pawlte inzawmkhawmna; North East Students Organisation (NESO) meeting-in NE Statewide Protest neih tura a lo rel tawh angin, Mizoram-ah pawh MZP General Headquarters Aizawl chuan MZP Conference Hall-ah he hun hi a hmang.
He Sit-in Protest hun hi MZP General Headquarters President Pu Lalnunmawia Pautu chuan a kaihruai a, NESO Finance Secretary Pu Ricky Lalbiakmawia’n NE statewide protest neih a nih chhan hrang hrangte a sawi. North East-in time zone hran a mamawh thu leh India sawrkar laipuiin Myanmar raltlante hamthatna tha zawk pe a, an ram buaina a reh hma chuan chenna, ei leh in bakah naupangte zirna ngaihtuahsak tura india sawrkar laipui ngenna-te a tel thu a sawi.
NESO demand pawimawh zualte chu:
1. Dan sakei Armed Forces (Special Powers) Act (AFSPA)1958 hlih ni rawh se.
2. Citizenship (Amendment) Act, 2019 hlih ni rawh se.
3. North East chhunga state ramri leh International ramria harsatna awmte a rang lama sutkian ni rawh se.
4. North East mite tan hnam leh nunphung (culture) mila Educational policy duan ni rawh se. Tin, North East-ah University, technical and vocational institute, medical and engineering colleges leh research centre a tam thei ang ber din belh ni se, college leh university-ah hetiang lam zirna course dah belh ni rawh se.
5. India sawrkarin NE region tan ei leh bara kan intodelh nan, Economic development policy tha tak duang rawh se. Act East Policy atan NE chhungah ngei administrative centre dah ni rawh se.
6. Sawrkar laipuiin hna neilo (unemployment) a harsatna sukiang rawh se. NE special employment Zone puan ni se, Central office hrang hrang-a grade III & IV hnate chu a state mi leh sate (son of the soil) tan dah ni rawh se.
7. India Contistution-ah NE mipuite tan ram leilung hausakna chungchangah ‘special constitutional status’ siam ni rawh se.
8. North East India tan Time Zone hran siam ni rawh se
9. India sawrkarin Myanmar atanga an taksa himna zawnga lo tlante tan chenna, ei leh in tur bakah zirna an chhunzawm theih nan ruahmanna siamsak rawh se.
He NE state wide protest hi, NE state hrang hrangah kalpui a ni a. All Assam Students’ Union, All Arunachal Pradesh Students’ Union, Khasi Students’ Union, All Manipur Students’ Union, Garo Students’ Union, Tripura Students’ Union leh Naga Students’ Federation te pawhin he hun hi an hmang a ni.
