Vawiin August ni 23, 2022 (Thawhlehni) hian MPCC Campaign Committee ruahman angin Pu KS Thanga, Ex-Minister, PAC member, MPCC chuan Champhai South Block Congress Committee Extended Meeting a neihpui.
Pu KS Thanga chuan thu sawiin, “MNF Sorkar leh Congress Sorkar kha tehkhin zahthlak khawpin a inṭhat hleih a. Congress Sorkarin kan tih loh tur zu kan zawrh avanga Congress Sorkar kha tla ta kan ni a. Pathian rawngbawltute ṭawngṭaina chu Pathianin a chhan sak a, rorelna aṭanga paih thlak kan ni a, kan tihsual zia kan hria a, Zoram mipuite leh Pathian rawngbawltute hnenah ngaihdam kan dil a ni. Zu hi kan zuar nawn tawh dawn lo a ni,” a ti.
Pu KS Thanga chuan, “MNF te hi an sorkar hun ala rei loh teh lul nen Mizoram an sawp chhe nasa hman hle a. Mizo mipui thinlung an ti nain mipuiten Congress Sorkar kha an ngai hle a. Zoram mipuiten Congress Party an rawn pan khawm leh mek a ni. Congress sorkar lai khan opposition party ten eirukna leh rorelna ṭha lo tih chungchangah Congress Sorkar beihna tur an hre lo hle a ni. Congress Party chuan mi retheite tan ngaihtuahna nasa tak kan seng ṭhin. Central lamah project siamin NLUP ah vaibelchhe 2,871 lai min pawmpui a, Mizoram budget chengkhat pawh pawt hêk lovin miretheite tan kan lo luang chhuak a. Kan lawmna ber chu Pathianin a ensan ngai loh mirethei leh chhumchhia, hmeithaiten lei rem an rahna tura a thawktu kan ni kha kan lawmna ber a ni,” a ti.
Congress Ministry-a Parliamentary Secretary i/c Finance lo ni tawh Pu KS Thanga chuan, “Pu Lalsawta nen Finance kan chan ve chhungin theihtawp kan chhuah a, chumi a zarah Sorkar hnathawkte tan kumtin GP Fund ah vaibelchhe 500 aṭanga 600 vel kan pe chhuak ve thei. Sorkar hnathawk hlawh batsak lovin a hun taka kan pe ve ṭhin. Pu Lalsawta thiamna leh finna a zarah Congress sorkar khan vaibelchhe 700 chuang lai mai kan hnutchhiah ve thei a. Hmasawnna hna tam tak NEDP hnuai aṭang pawhin kan thawk ve thei a ni. Nimahsela, vawiin niah chuan kan ram roreltute hian thluaka sum lut natna an vei mek avangin kan ram a damlo a. Sorkar hnathawkte hlawh a hunah pek theih a ni lova. GP Fund phei chu beisei ngam chi a ni lo. Ram tana theihtawp chhuaha hna thawk turin Pu Lalsawta hovin Congress Party kan inbuatsaih chho mek a. He kan ram neih chhun Mizorama cheng Mizote hi thlamuang tak leh zalen taka, nuam ti taka kan len ho leh theihna tur atan Congress sorkar leh hi angai a ni,” a ti bawk.
