Vawiin Dt. 25th August 2022 hian Aizawl West II Special Block Conference neiin Pu Lalsawta, President MPCC in a hmanpui a, he hun hi Pu Aldrin Zosangliana President, Aizawl West II Congress Committee in a kaihruai a ni.
MPCC President Pu Lalsawta chuan thu sawiin, “Pathian leh mipui laka Politician-te mawhphurhna chu ram rorelna tha siam a ni. Pathianin hnam tin ram leh mipui min pe a, chung thil pahnih enkawla hmang tangkai (manage) thiam apiang chuan ram nuam leh ram hmasawn an siam thin. Kan ram hi dinhmun chhe takah a ding mek a, hemi siam thaa Mizoram hi tungding turin kan rama eirukna leh sum um atchilhna hi tihbo a, kan rawngbawlsak mipuite la retheihzia hriaa retheih leh hah huamte’n hma kan lak a ngai a,Congress hruaitute’n kan inhuam a ngai a ni,” a ti.
“Mipuiten eizawnna nghet an neih theih nan Cooperative Society leh MSME te nasa taka kan uar a, thlai thar zawrhna leh sawngbawlna rintlak buatsaih a ngai a. Ram mipui hi chuan Politics a inchirh theh Ieh inpuhna chhe pui pui hi hawisan a, an hnathawha an bur ngar ngar hi an duh a ni. Hmasawnna leh eizawnna ngelnghet neihna turah ngaihtuah ngai pawimawh pahnih (1) Environment humhalh leh (2) Taima te leh rinawmte hlawhtlinna ramah kan ram hi kan siam angai a, Ram rorelna tha nei tur chuan Sorkarin thuneihna insemzai (Decentralisation) hi a tihpuitlin a pawimawh a ni,” a ti bawk.
Mizoram mamawh ber chu system tha a nih thu sawiin, “Mizoram hi taima leh rinawmte dinchhuahna ramah kan siam thei a, SYSTEM THA – Hei hi kan mamawh ber chu a ni,” a ti.
He hun ah hian Pu H.Rohluna Ex Minister te Pu H.Zothangliana Ex MLA te bak ah Pu Vanlalhruaia GS ADCC ten thu ngaihnawm leh hmasawn nan a tha tak tak te an sawi bawk a, Pu Lalhmingmawia Adviser Aizawl West II Block Congress Committee in lawmthu sawiin hun a khar a ni.
Vawiinah vek hian Godfrey Tower, College Vengah Aizawl South-I Congress Special Block Conference neih a ni bawk a, MPCC Gen Secretary Pu John Siamkunga leh Aizawl District Congress Committee hruaituten an hmanpui bawk. Tunlai hian AMC area a Congress Block hrang hrangah Special Block Conference neih mek a ni.
