Khawchhak tlangdung fanga fehchhuak mek ZPM hruaitute chuan East Tuipui North Block buatsaihin nimin August 25, 2022 khan Khuangleng leh vawiin August ni 26, 2022 hian Champhai South Block buatsaihin Champhai Dinthar leh Zote-ah te hun hman a ni bawk a, Pu K. Sapdanga, ZPM Working President chuan hengah te hian thu a sawi a, General Secretary pahnih – Pu R Lalchhuanmawia leh Er.Lalhmingliana ten political training an pe thin bawk a ni.
Pu K. Sapdanga chuan, “Politics kal sual chu mi tinin kan tuar a, politics kal dik chu mi tinin kan chhawr. Politics a kal fuh loh chuan khaw kilkhawr apiangin an tuar nasa thin. MLA-a tlin te, Minister nih te hi hlawhtlinna vawrtawpa ngaih chi a la ni lo a, mi hlawhtling ni tura dinhmun remchangah kan chuangkai tihna mai a la ni. Nihna hi lungawipui a la hun lo. Vawiinah hian, mi tinin kan hmuh leh kan hriat kan phat theih miah loh chu KAN RAM HI SAWKAR THA neih chakin a tui a hal tih hi a ni. Mipuite tuihal chhan chu tui intur tha an hmuh lohna a rei tawh tihna a ni. Kan ram tuihalna tireh turin ZPM chuan sawrkar Kalphung Thar a mamawh tih hi a auhla a ni a, chu mi hlawhtlintir theitu chu mipuite kan ni,”a ti.
ZPM Working President chuan, “He hnam chhuan lo la awm zel tur tana pawikhawih bansan tawh turin thuneihna chang mekte hi tih tak zetin kan ngen a, kan ram siamthat hna te, kan hnam tihhmingthat hnate hi kan ram hruaitute kutah chauh a awm lo a, an nupui fanaute kutah te, kan zavaia kutahte hian a awm a, kan hma lawkah hian duhthlan theihna hun remchang a awm dawn, kan tu leh fate tan leh keimahni tan he ram tuihalna ti reh turin kan ngaihtuahna seng ila, hmun kilkhawr ber atang pawhin mi tinin kan ram siamthat hna hi kan thawk thei vek a ni,”a ti bawk.
Khuanglengah hian ZPM zawm thar mi 144 lawmluh an ni a. Lawmluh tharte aiawh a thusawitu Pu J. Vanlalvunga, Khuangleng Congress hlun chuan, “Congress kumkhua tura lo inngai thin ka ni a, ngun takin ka zir a, ZPM policy hi tha ka ti a, mi ten Pu Duha leh Pu Sapa inkara khi awm anga an sawite hi puh chhiatna mai a ni tih ka zir chian hnuah ZPM hi lawm takin ka rawn zawm ngam a ni,” a ti.
