World Photography Day kum 183-na pualin vawiin khan Mizoram School of Photography leh Photography Club of Mizoram chuan Millenium Centre-ah Photo Art Exhibition vawi 6-na an buatsaih a. I&PR Minister Pu Lalruatkima chu khuallian niin ni hnih awh tur exhibition hi a hawng a ni.
Pu Lalruatkima chuan thlalak thiltihtheihzia sawiin, sawi leh chhiar piahlamah thlalak ngei hian thil thleng a ti chiangin a tifiah a, ngaihruatna mai ni loin darthlalalanga in en ang maia chianga kan hmuh theih avangin, thinlung thlengin hna a thawk thei hial a ni, a ti a. Thlalak chu thil tisualte man chhuah nan a tangkai a, hmun nuam leh mawi phochhuahna a nih avangin tourism atan a tangkai a, a tangkaina hi sawi sen a nih loh ang bawkin a hmang sual duh tan erawh thil tha lo tam tak titheih a ni, Minister chuan a ti. Photographers rual kalkhawm te chu an thiamna te chhawr tangkai a ethics inzirtirna kawnga hma la turin a fuih a. Mitinin mahni iptea camera kan ah vek tawhna khawvelah social media kaltlanga mipui hmuha phochhuah rem leh rem lo thliar thiam a, inzirtir a pawimawh tih a sawi. Hmanlai chuan silai puin mi an ramvak thin a, tunlaiah erawh camera nen ram an vak thin ta zawk tiin I&PR Minister Pu Lalruatkima chuan nungchate humhalh nachang kan hre ta hi hmasawnna ropui tak a ni a, hetiang lama tui mi photographers te chu thalai te entawn tura nung zel turin a fuih bawk a ni.
Photo Exhibition hi a duh apiang tan tel theih a ni a. Thlalak 130 a lut a, mi 39 an tel a ni. Monochrome leh colour ah thenin inelna neih nghal a ni a. August ni 27 hian lawmman dawngtute puan a ni dawn a, colour leh monochrome-a pakhatna te hi rampum huap intihsiakah an tel dawn a ni. He exhibition buatsaihtu Mizoram School of Photography hi kum 2017 khan din niin National Academy of Photography, Kolkata hriatpui (recognised) a ni a, MSP atanga zirchhuakte hi Photography Club of Mizoram (PCOM) an din a. He Club hi Federation of Indian Photography hnuaiah an inziak lut a ni.
