Mizoram chhunga ruihhlo vanga mante Court-in na takin a hrem.

Dr. HTC Lalrinchhana, Judge Special Court (NDPS Act), Aizawl District chuan nimin Nilaini khan September ni 10, 2017-a Heroin gram 20 (Hawng 2) neih
vanga man, Excise & Narcotics Case no. N-154 of 2017 Dt. 11.9.2017 under section 21(b) of
NDPS Act, 1985 tlawhchhana thubuai siamsak, Zorammuana, Tuirial
Ainawn Veng chu thiamloh chantirin rim taka hnathawk chunga kum 3 Jail tang tur leh
pawisa cheng 6000 chawi turin a chung thu a rel. Special Court (NDPS Act)-in thiamloh a
chantir Zorammuana hi November ni 11, 2021 khan ruihhlo vang thovin thiamloh chantir a lo
ni tawh a. Tunah hian Sairang Police Station-ah case ngaihtuah lai a nei mek bawk.
Special Court (NDPS Act) hian November ni 30, 2021 khan Heroin gram 266 (Hawng
21) vanga June ni 9, 2017-a Excise & Narcotics Department-in an man, Case No. N-92 of
2017 Dt. 10.6.2017 Under Section 21 (C) of ND&PS Act 1985 hnuaia thubuai siamsak,
Paulamchin, Myanmar chu thiamloh chantirin rim taka
hnathawk chunga kum 10 chhung Jail tang tur leh pawisa cheng 1,00,000 chawi turin a
chungthu a rel bawk. Court-in thiamloh a chantir, Paulamchin hi bail-a chhuak mek lai a ni a,
damlohna avanga damdawiina enkawl mek a ni. Damdawiin atanga a chhuah veleh Jail-ah a
tan hun tura ruat hi a hmang nghal dawn a ni.
Dr. HTC Lalrinchhana, Judge, Special Court (NDPS Act) chuan ruihhlo ti thinte chu
Dan angin an chungthu relsak an ni ang a, an thiltih sualte fiahfiahna tha tawk a awm a,
Court-in thiamloh a chantirte chu an phu tawk anga hrem zel an nih tur thu a sawi. Hetih rual
hian Sawrkar tana ding, Assistant Public Prosecutor Pi Lalremthangi leh Pu Zoremtluanga
ten theihtawp chhuaha dan bawhchhiaa puhte diklohna an hailanna avangin dan bawhchhetute
hian an phu tawk rorelna dik chu an hmu ta a ni.