Vawiin khan Mizoram State Boundary Committee chu an Chairman Tawnluia, Dy. Chief Minister hovin Directorate of Forensic Science Laboratory Conference Hall-ah a vawi 4-na atan an thukhawm a. Meeting-ah hian Home Minister Pu Lalchamliana, Supply Minister K. Lalrinliana, LR&S Minister Lalruatkima, Forest Minister TJ Lalnuntluanga, Chief Secretary charge la mektu Manisha Saxena, DGP, Devesh Chandra Srivastava bakah Boundary Committee Member zingah MNF, ZPM, MZP, MHIP, MUP, JAC on ILRFD aiawhte an tel a, Kolasib leh Mamit district bawrhsapte, ramri chungchanga mithiam sawm bikte leh Home Department official pawimawhte an tel a ni.
Boundary Committee Chairman Dy. Chief Minister Tawnluia chuan Member leh sawm bikte lawmna thu sawiin meeting koh a nih chhan leh thurel tur tlangpui a sawifiah a, hemi hnu hian H. Lalengmawia, Commissioner & Secretary, Home Department, Boundary Committee Member Secretary ni bawk chuan member-te sawiho tur Agenda sawizauna a nei zui a ni.
Vawiin meeting hian August ni 9, 2022-a Mizoram leh Assam sawrkar aiawh ten Aijal Club-a inbiakna an neih tuma thuchhuah intawm (joint statement) an siam chu an thlirho a, Assam sawrkar hnena thlen tur Mizoram sawrkarin ramri chin atana a hauh (inner line of 1875) an sawiho bakah kumin October thla chawhnu lama Guwahati, Assam-a Mizoram sawrkar leh Assam sawrkar aiawhte inbiak huna an thu ken turte leh thil pawimawh dangte an sawiho a ni.
Vawiina meetingah hian pawl leh party hrang hrang aiawhte chuan ramri buaina chinfel a nih a, inremna neih thuai an duh tawh thu an sawi hlawm a ni.
Uluk leh chipchiar taka sawihona neih a nih hnuah vawiin meeting chuan Mizoram-Assam ramri chinfelna tura State Boundary Committee in an buatsaih “Approach Paper” chu October thlaa State pahnih aiawhte inbiak hunah Mizoram aiawh ten tan chhan atan hmang se an ti a, hei bakah hian State pahnih ten ram an hauh chin ve ve a hmuna endik turin Joint Verification neih ni se an ti bawk a ni.
Meetinga tarlan a nih danin August thlaa State pahnih aiawhte thuchhuah intawm bawhzuiin August ni 24, 2022 khan Kolasib, Mamit, Cachar, Karimganj leh Hailakandi Deputy Commissioner-te chuan 225 CRPF Camp, Vairengteah inkawmna an nei tawh a, thla thara State-level inbiakna neih a nih hnuah inbiak chhunzawm an tum a, Boundary Committee thutkhawm hnuhnung ber November, 17, 2021 hnu khan State pahnih ten Minister-level virtual meeting vawi 3 an nei tawh bawk a ni.
Boundary Committe thutkhawm hmasa ber hi July ni 30, 2021 khan neih a ni a, thutkhawm vawi 2-na hi September ni 7, 2021 khan neih niin a vawi 3-na chu November ni 17, 2021 khan neih a ni.
