Chief Minister Pu Zoramthanga chuan nimin (9.9.2022) khan CM Conference Hall-ah Dr. Laltluangliana Khiangte lehkhabu (lemchan) ziah “Mi Ngo Nukiri leh a fapa Tlira” chu a tlangzarh.
Chief Minister chuan Mizo literature tihausa belh tur lemchan lehkhabu ziak tlangzarh thar a nih chu lawmawm a tih thu leh, history a thil thleng behchhan a nihna chuan thil thlen dan leh Mizo history chhui zui tham a la awm ngei tih a rawn pho lang nia a hriat thu a sawi a. Literature hausakna mai bakah history zirchian belh duhna te a hrinchhuah belh zel a beisei thu a sawi a ni.
Adviser to Chief Minister Pu C. Lalramzauva pawhin lemchan lehkhabu tlangzarh thar chuan Mizo culture bakah mihring leh khawtlang nun zirchianna ni tel, belhchiantlak tak nia a hriat thu a sawi.
Lehkhabu tlangzarhna inkhawm hi Prof. R.L. Thanmawia chuan kaihruaiin, lehkha u thlirlawkna Pu Vanlaltana Khriangte chuan a nei a. A bu ziaktu Dr. Laltluangliana Khiangte chuan thu tawi sawiin, mi tak tak leh thil thleng tak tak behchhana ziak ni mahse lemchan a nih angin thu belh engemawchan a tel tih hriat tha a tih thu a sawi.
Mi Ngo Nukiri leh A Fapa Tlira tih lemchan hi chan thumah thensawm a ni a, lan 11 a awm a, chan thumnaah lan 3 a awm a, a dang pahnih hi lan 4 ve ve a ni. Phek 112-a chhah, a lemchan phek tak chu 100, cheng 150 man a ni.
Mizo lalte khan intiamrualin an chhehvel ram te kha an run fo va, kum 1840-1870 inkar, kum 30 chhung vel ringawt pawh khan Chittagong, Burma, Manipur, Cachar, Sylhet leh Tripura te chu vawi 20 vel zet chu an run a (Zoram Vartian 35). Kum 1871, pawlkut thla ni 23-a Bengkhuaia pasaltha ten Alexandrapur thingpui huan an zuk a. Chu lai tak chu he lemchan bul intanna tak hi a ni a; a nghawng chhuah ngaihnawm takte chu he lemchanah hian eng emaw zat hmuh theih a ni.
Dr. Laltluangliana Khiangte hian lemchan puitling 29 a ziak tawh a, tawng danga lehlinte nena chhiar chuan lemchan 43 tha a ziak tawh a ni. Chung avangte chuan kum 2018 khan cheng nuai khat keng Sangeet Natak Akademi Puruskar (Award for playwright) chawimawina a dawng a ni.
