Vawiin khan Congress Party chuan Aizawl press club ah thuthar thehdarhtute kawmin, “MNF sorkar hnuaiah sum leh pai harsatna chuan a vawrtawp a thleng chho mek a. Mizoram leiba nasa takin a pung a, sorkar hnathawkten thla tirah hlawh an la thei tawh lo a; Finance Minister a ngawih reng laiin Minister thenkhat ten sorkar hnathawk te hlawh lak hun tur an duh hun hunah an puang a; Health Care bill ba ringawt pawh cheng vbch. 77 zet a tling tawh a, contractor tam berten hun rei tak an hnathawhna bill an la thei tawh lo bawk. Mizoram sum leh pai dinhmun chu ‘siamthat mai theih tawh loh khawpa dinhmun chhiaah’ a ding ta a ni. MNF sorkar pawhin tihngaihna an hre tawh lo a, kil hrang hrangah puk tur an dap ngat ngat reng a, sum awm hmasa apiang leiba rulh nan leh hlawhah a kal zel a ngai a, LEIBA THANGAH nghet takin Mizoram chu a tang ta a ni. Hetiang taka dinhmun chhiaah hian Mizoram sorkar hi a la awm ngai lo,” an ti.
MPCC media department chairman Dr. Lallianchhunga chuan, “Hetiang taka Mizoram sorkarin sum leh pai lama harsatna a tawh mek lai leh Contractor tam zawkin bill an lak theih loh laiin Chief Minister duhsak zawng Contractor-te chuan bill lak kawngah harsatna an tawk ve ngai lo a. He thil hi thup tumin Pu Lalhruaitluanga Bawitlung RTI zawhna July 15,2022 a mi pawh an chhang duh lawk lo a, Mizoram State Information Commission (MSIC)-ah lungawihlohna (Complaint) thehluh a nih tak hnuah August 19,2022 a MSIC thupek angin Mizoram hmun hrang hranga Treasury Office 9 te chuan 01.04.2019 – 14.07.2022 inkara Contractor te bill nuai 100 chunglam chin an dawn ni leh an pek chhuah ni tarlangin RTI dilna an chhang ta hram a ni. RTI chhanna atanga a lan danin an duhsak zawng contractor-te bill an hrensak ve loh dan hetiang hian chiang takin a lang :
Kamlova Chhangte bill pathum – Rs. 1,54,15,277 te,Rs. 3,47,24,723 te, Rs. 4,00,00,000 te, a vaiin, cheng vaibelchhe 9 chu an thehluh ni la lain Siaha Treasury atangin release nghal a ni.
Kamlova Chhangte bill hrang hrang cheng vaibelchhe 9.92 chu chawlhkar khat chhung lekin Siaha Treasury atanga release vek a ni bawk.
“Chief Minister laichin (a tupa?) Zoramchhana bill 2 cheng vaibelchhe 8.84 chu bill a thehluh ni la lain Aizawl South Treasury atanga release a ni a, a bill dang 2 cheng vaibelchhe 3.65 pawh ni 3 chhunga release vek a ni bawk.
Pu Robert Romawia Royte Company NECS bill te, MLN Projects bill te, F. Lalliansanga bill te, Tantia Construction Ltd bill te, a vaiin cheng vaibelchhe 8 chuang pawh bill thehluh ni la lain release vek an ni bawk,” a ti.
