Vawiin ni 12.09.2022 (Thawhtanni) 11:00AM khan Golden Hall, Congress Bhavan-ah Pathian ‘Siamthar lehna Crusade’ hun hman a ni a. Rev. Vanlalzuata chu Speaker a ni.
Siam thar lehna crusade -ah hian Rev Vanlalzuata chuan Pianthar leh rinawmna pawimawh zia sawiin, Sam 37:3-ah, Lalpa chu ring la, thil tha ti rawh; He ramah hian awm la, rinawmna um zel rawh….” kan hmu, khawvela natna tam ber chu rinawm lo natna, mi rinawm lo te avangin mi tam tak an na a, mi nunah kan nâ kan na thin. Rinawm lohna in kan ram, Kohhran, Political party leh mipui te min ti na thin. Mi rinawm lo chuan thil tha ti mahse rin a hlawh tak tak thei lo, a ti.
Thil hmuh leh sawi dan in ang rengah mi rinawm lo chuan thil dik a hmuh leh a hriat sawi mahse awih a hlawh ngai lo. A sawi leh tur pawh dawt bawk, an ti a, Pathian thu duh em em, khawi hmunah pawh sawi nasa hnam, mahse tu thusawi mah awih lo hnam nih hi a pawi a ni. Mi rinawm chu midang pawhin amahah thlamuanna an hmu thin, a ti.
Mizo hnam hi rinawm lo kan ni ngai lo. Buh seng laiin m henawmte buh vui an lo lama lo uai lut pawh thenawmte lo lamah an dahlet thlap thin, Rinawmna vanga kawngka pawh kalh ngai lo hnam kan ni. Ruk tur nei mah se ruk duhna thinlung an pu ngai lo. Sipai inthununnaah rinawmna an ngai pawimawh a, a tul a nih chuan mahni chhungkua, thisen zawmpui te pawh ram tana an rinawmna vangin an nunna lak a ngai thin, a ti.
Kum 1946 atangin Mizoten Politics kan khel a, Rinawm lohna a rawn inlar tan, tih lehkhabu ziaktuten an sawi tih sawiin, Tunhmaa awm ngai lo Corruption te sawi sawi a lo ngai ta.
Suala piang a, suala pai kan ni. Mahse Pathian zarah kan rinawm thei. Keimahah rinawmna a awm lo, kan rinawm leh awm lohah Pathian kan rin dan a lang chhuak a, Pathian kan hriat dan ang zelin kan nung thin. Rinawmna chu hmuh theiha rinawmna a ni. Rinawmna leh Thil tih chu a inkawp tlat a ni.
Thlarau thik khawp hialin kan rinawm tur a ni. Thil thiang lo lak avangin Pathian mite chuan harsatna an tawk thin, thil dik lo leh thianglo tih pawha kan nunah harsatna leh inthiam lohna kan nei miah lo a nih chuan Pathian kan hlat hle a ni. Thlarauvin an nuna thikna a neih loh te chuan Pathian be mahse a biakin awmzia a nei lo, a ti.
Dubthusamin tumah kan nung thei lo. Mahse nitin kan thi anga, a hma aia tha zawkin nun thar kan nei ang. Chu chu Siam thar lehna Crusade kan tih chhan a ni. Sap ramah inkhawm an bansan, inkhawm tur an hmu zo lo, keini pawh an tan kan tawngtai, mahse an rinawm em em si. Keini chu kan inkhawm nasa em em, mahse rinawm lohna vangin kan buai em em thung si. Inkhawm leh khawm loh hi a chhanna tur a ni lo. A chhanna chu Inkhawm bawk ila rinawm bawk ila, a fel mai, a ti bawk.
Pu Zuata chuan, He ramah hian awm ila, Rinawmna hi a bul berah vawng nghet ila, Zoram thar, he ram hi kan tu leh fate tana chenna tlakah, ram nuamah siam a tul. Great Wall of China chhunga hmelma te an luhruk theihna chu an fate nunah rinawmna an tuh lohva pawisa hmanga thamna an do zawh loh vang a ni. Kan ram siamthatna bulpui ber chu kan fate nunah rinawmna kan tuh a, eng pawl ah pawh, eng Kohhranah pawh, sumdawnna leh office ah pawh, khawi hmunah pawh awm la, Rinawmna um zel chu ram leh hnam dinchhuahna a ni, a ti.
He hun hi Pu TTZothansanga G/s MPCC in a kaihruai a. Nula Sangkimi Khiangte in Pathian fakna hla a sa bawk. Congress Party hian Pathian Biak inkhawm leh tawngtai rualna hun hi kartir thawhtanni apiangin hman thin a ni a.
