Dr.R.Lalthangliana’n Centre a dawr chhunzawm

Sawrkar laipui dawra New Delhi-a cham mek Dr. R.Lalthangliana, Health & FW, Higher & Technical Education leh Commerce & Industries Minister chuan vawiin khan Union Human Resources Development & External Affairs Minister of State Dr. Rajkumar Ranjan Singh chu a pisaah hmuin, Mizoram University – Southern Campus, Lunglei a din tura sawrkar laipuiin kum 2020 January thlaa notification a lo tihchhuah tawh chungchangah sawrkar laipui hmalakna muang lutuk leh harsatna thar rawn awm chungchangte khunkhan taka sawipuiin, Mizoram sorkarin a dinna tur ram a tihfel tawh thu hrilh nawn lehin chak taka hmalakpui turin a nawr a, Mizoram University Vice-Chancellor Prof. KRS Sambasiva Rao pawh telephone a be nghalin Union Minister chuan Mizoram University Act, 2000 ah Mizoram University campus/centre dang hawn phalna dan a awm tih a hriatin e-mail hmanga rang taka thawn nghal turin a hrilh a, hemi dan tlawhchhan hian theihtawp chhuaha hmalak a lo tiam a ni.
Dr. R.Lalthangliana hian Union MoS hi RUSA chungchangah India ram puma harsatna lian tak an tawh dan leh a nghawng awm theite a sawipui bawk a, RUSA-3 hi rawn kalpui leh ngei tura ngenin, Dr Rajkumar hian a lo ngaihpawimawhsak hle a, Ministry of Education-a Joint Secretary Pi Saumya Gupta, IAS chu biaksakin Dr Thangtea hian Joint Secretary hi a hmu nghal a, ani hian Dr Thangtea’n Mizorama RUSA 2.0 hnuaia harsatna an tawh hrang hrangte chinfel dan ngaihtuah rang tura a ngenna chu chhangin uluk taka a lo enzui tur thu a sawi a, RUSA 3.0 tihlawhtling thuai tura Minister thu thlen pawh hi Pi Saumya chuan a guidelines pawh thla 2/3 velah an zawhfel a beisei thu leh an peihfel veleh Union Cabinet Meeting-ah ngaihtuah tura thlen a nih tur thuin a lo chhang a ni.
External Affairs Minister of State Dr. Rajkumar Ranjan Singh hnenah hian Dr Thangtea chuan Pu Tipu Munshi, Hon’ble Minister, Ministry of Commerce, Bangladesh-in kumin April thlaa Mizoram a rawn tlawh tuma thuchhuah intawm (joint statement) an siam copy chu thehlutin External Affairs Minister a nihna anga hma laksak turin leh Bangladesh lam pawh dawrsak turin a thlen a, Dr Rajkumar chuan uluk taka a lo zirchian tur thu leh theihtawp a chhuah tur thu in a lo chhang a ni.
Dr. R.Lalthangliana hian Minister hian MSME Secretary Pu BB Swain pawh hmuin Mizorama Industry tenaute tihchangtlunna tur DPR pali a thehlut a, heng DPR te tihhlawhtlin dan tur leh Mizoram sawrkar hmalakna tur thil chi hrang hrangte, Mizorama Industry tenaute tih hmasawnna tur thildang pawimawh chi hrang hrang an sawi dun a ni.
Union Commerce and Industry Minister Piyush Goyal hova naktuka Board of Trade meeting neih turah Dr R. Lalthangliana hi a tel ang a, hemi zawh hian Bangladesh High commission tlawhin an hotu pawimawhte nen border trade chungchang an sawiho ang.