Pathianni zan khan Vaivakawn 4 Lane opposite kawngsir luikawr ah mipa ruang chhar a nih bakah Thawhtanni chawhnu khan a bul hnaiah mipa ruang dang chhar a ni leh a, thite hi tunge an nih hriat a ni lova, Police ten an chhui chiang mek.
Vaivakawn Police Station atanga thudawn danin tun Pathianni kalta zan dar 10:40 ah report an dawn angin, Vaivakawn leh Rangvamual inkar 4 Lane opposite kawngsir luikawr ah mipa ruang hmuh a niin, amah hi kum 30 leh 40 inkar bawl vel feet 5:5 vel asang a ni a, a taksa ah hian hliam a hmui veilam ah kak thui tak awmin, a beng thleng dawn in a kak a, a lu bek dinglam ah hliam na deuh a tuar bawk a ni. A ruang an hmuh hian ala khawng lo a, alan dan atang chuan kutthlak a nih hmel tih Police te chuan an sawi.
Police ten hnu an chhuina kalzel ah tuna ruang an hmuhna bul lawk kawng chhak ah tho Thawhtanni chawhnu dar 2:30 ah mipa ruang tho hmuh leh a ni a. A lu ah hliam a tuar a, amah hi alan danin kum 30 atanga kum 40 bawr vel a nih a rinawm a. A bawkkhup zawngin alo awm a ni. Police te sawidanin mi kuttuara thi a nih an ring tho a ni. Heng mipa ruang pahnih te hi tunah Civil Hospital ruang dahna (Morgue House) ah dah niin, postmortem an ni a. Police hotute hnen atanga thudawn danin mipa ruang pahnih te hi tunge an nih a, tute nge an chhungte tundinhmun ah hriat mai theih a nih loh avangin an chanchin hria emaw an chhungte hria emaw chuan Vaivakawn Police Station ah emaw, Police Station hnaih ber ah hrilh hre turin mipui te an ngen a ni.
Confirm an nih hunah thlalak hi paih leh a ni ang…
