Sawrkar Laipui a Minister of State for Consumer Affairs, Food & Public Distribution and Rural Development Sadhvi Niranjan Jyoti in vawiin khan Secretariat Conference Hall, MINECO ah, Food, Civil Supplies & Consumer Affairs Department hotute, Food Corporation of India (FCI) leh Bureau of Indian Standards (BIS) Hmarchhak Office hotute meeting a neihpui.
Meeting ah hian Central Minister chuan Food, Civil Supplies & Consumer Affairs hotute chu ration buhfai semna reng rengah khawl bukna a chhiat palhin, buk lung pangngaiin an buk ngei tur a ni a ti a, ration semna hmun thenkhata bur leh tin te an hman thin thu a hnenah nimin lama a zinnaah an thlen chu thil phal loh hulhual a nih angin hetiang hi a awm loh nan Supply hotute chu hma la a, enfel turin a hrilh a. FCI lamin Mizoram hmun 6 a Kudam an neih thu an tarlan chungchangah Minister chuan District tinah FCI Kudam hi awm se duhthusam a ni dawn tiin hemi chungchang hi lo zirchiang turin FCI lam hi a hrilh a, Mamit District chu Aspirational District a nih angin Mamit chu ngaihpawimawh hmasa ni se tiin a hrilh bawk a ni. Mizoram tharchhuah thei – lakhuihthei leh dragonfruit leh thlai dangte dah thatna tur Cold Storage tun aia tam zawk neih a tul tiin hemi kawnga hian hmalak a tul thu leh a tul chuan amah pawhin Food Processing Ministry a lo enkawl tawh thin angin puih a inhuam thu a sawi bawk a ni.
Meeting ah hian BIS, Hmarchhak hotu chuan Bureau of Indian Standards in Hmarchhakah consumer ten an chanvo leh dikna an hriat theih nana hma an lak dante, BIS certification dinhmun te an tarlang bawk a ni.
BIS hnuaia hian Mizorama thilsiamna (factory) 8 in BIS Certification an nei a, hengte hi thir siamna factory 2 leh tui (packaged water) sawngbawlna factory 6 te an ni. Hei bakah hian rangkachak kaihhnawih ah, a quality leh a dik tak a ni em tih finfiah ‘Hallmarking’ chu Mizorama rangkachak zuar mimal 1 hnenah pek a ni bawk.
Meeting zawha Minister in helai hmunah tho Press Conference neiin thuthar thehdarhtute zawhna thenkhat a chang a ni.
