16th August 2022 : Vawiin chhun dar 12:00 khan Mizoram chhunga hmasawnna hna tam tak leh lian tak tak thawktu National Highway Infrastructure Development Corporation (NHIDCL) hotu lian pahnih Virendra Jhakhar Project Executive Director leh Dhairya Vaibhav Senior Manager leh Central YMA hnuaia NHIDCL hnathawhte viltu tura din, Monitoring team te chu an chairman Lal hmachhuana Vice President, Central YMA leh Secretary, Prof. Malsawmliana te hovin Ajal Club-ah an in kawm a.
He inkawm hona hunah hian NHIDCL hnathawk meka ram mipuite duh khawp lohna lai leh hna tha taka an thawh theih nana Central YMA in an duhthu an lo thlen tawhtea NHIDCL lamin an bawhzui dante report pein NHIDCL hotute hian an hmalak meknate an sawifiah a. An kawng zauhnaa ko pang an laih hekna laiah te lei min ven nan Hydro Seedling & Mulching Technology hmanga thlai, thing leh mau an phun dan tur an sawifiah a. Project dang an neih leh tur leh Mizoram a an hma chhawp tam tak leh Mizoram tana hmasawnna tur a nih dan te an sawi bawk a. Harsatna an tawh thinte leh a sutkian dan tur te pawh thil tam tak an sawi ho a ni.
Central YMA hruaitute chuan an hnathawkina thing leh mau ti chereu lo thei ang bera hna thawk turin an ngen bakah chhiatna leh harsatna thlen lo thei ang ber tura hama la turin an chah a. Hmasawnna hna an thawh mek laia an paltlang khua leh mipuitena harsatna an tawh loh nana hma lak sak thin tura an ngennate an thlen a ni. Tin, Central YMA chuan NHIDCL in Mizorama an hnathawh leh tur reng rengah an bul tan tirhte atanga enpuia an hnathawh thlitlai reng tawh thin nise an ti bawk a ni.
Central YMA hruaitute rawtna angin karleh Nilaini Ni 21.9.2022 hian NHIDCL te hnathawh na a tam thei ang ber, a hmun ngeia tlawh turin ruahmanna an siam nghal bawk a ni.
