Land Revenue & Settlement (LR&S) Minister Lalruatkima’n vawiin khan Govt. Saitual College-ah SEDP hnuaia hmalakna pakhat Saitual khawpui huamchhung zawng zawng teh that (survery & resurvey) neih tur a hawng.
Khuallian Pu Lalruatkima chuan hripui lengin kum hnih chuang zet na taka min nuai avangin hmalak kan tum hun angah bul kan tan thei lova, hripui lengin ziaawm a pan hnuah theihtawp chhuaha LR&S department ten hma an lakna rah kan hmu a, Saitual khawpui leh a chhehvel uluk taka survey bul kan tan thei ta hi, a kalphung pawh Mizorama a hmasa ber tur a nih avangin hun chhinchhiah tlak tak a ni, a ti a.
Mizoram sawrkarin Flagship Programme pawimawh tak mai, mipuite eizawnna siam leh hmasawnna rahbi an lo rah ve theihna atan Socio-Economic Development Policy a duang a, chu chu a tak ram thlen tir turin kawng hrang hrangin hma lak mek a ni a, keini Land Revenue & Settlement Department lam pawhin trade hrang hrang heng – Vawk vulh te, Kel vulhte leh a dangte hi kalpui ve thei chiah lo mah ila, mitin leh chhungtin ina kan ro neih zinga pawimawh em em, kan in hmun leh ram kan neih ang angte felfai taka chhinchhiah a lo nih theihna atan hma kan la a ni a, hma kan lakna kal zelah, Saitual khawpui leh a chheh vel khaw then khata kan ram neihte Sawrkar hnuaia mumal taka chhinchhiah a nih ve theihna atan heti hian SEDP kaltlangin hmalak a ni dawn ta a ni, a ti.
Pu Ruatkima chuan Saitual District bakah hian Sawrkarin District thar a hawn Hnahthial leh Khawzawl ah pawh Land Revenue & Settlement Department in Office kan nei tawh a, he Programme Survey & Re-survey hi a theih ang angin kalpui tum a ni, a ti a. Saitual hi a hmahruaitu (pilot) a ni a, he thil hian nasa takin mipuite chanvo a humhalh dawn a, mumal takin Land Records pawh kan neih phah dawn a, a lawmawm takzet a ni, a ti a. Ram neitute chu an ram neihte cheibawl tha tur leh ramri chhinchhiahna felfai tak nei turin a chah a, hei hian buaina tam tak lakah min veng dawn a ni, a ti.
Minister chuan he Programme pawimawh tak SEDP atanga kalpui tum hi thil huphurhawm tak ni mahse, Survey lama thiamna nei an lo awm zel a, Saitual pawh Buannel Geo Solutions & Services ten uluk takin an thiamna hmangin Department nena tangkawpin Survey & Re-Survey hna hi an thawk dawn a ni, a ti a. Anni a thawk turte (Buannel Geo Solutions & Services) pawhin mahni ta a ni tih hria leh kan hnam leh kan ram tana thawk an ni tih hi hre reng turin, rinawmna leh taimakna nen, he hna an ko a tla hi an hlen chhuah ngei ka beisei bawk a ni,a ti a. He Survey & Re-Survey hna atana hma lakna kawngah Saitual khaw mipuite chu sawrkar hmalakna tawiawm turin a ngen a, harsatna lo siam lo tur leh hna tha taka official ten an thawh theihna atan a tanpuitu leh a kawng lo kawhhmuhtu ni turin a sawm bawk a ni.
Survey & Re-Survey of Saitual Town atana sum sen tur cheng nuai 52.81 SEDP kaltlanga pe tu Finance Ministet chungah Land Revenue & Settlement Department leh Land Revenue & Survey Board aiawhin Minister Pu Lalruatkima chuan lawmthu a sawi a. Saitual, Sihfa, Keifang, Ruallung leh Rulchawm a huam dawn tih sawiin khaw dang erawh a tul anga hmalak chhoh a nih zel besei a ni a ti a, chumi a nih mek lai chuan Central sawrkar atanga hmalakna kal mek Survey of Villages Abadi & Mapping with Improvised Technology in Village Area (SVAMITVA) hi a awm a, hemi hmang pawh hian tuna kan hna kalpui turin a khawih loh te pawh a la rawn hma chho zel tura ngaih a ni bawk, a ti a. He SVAMITVA hi tun Assembly Session liamta ah mai khan Mizorama kalpui a nih avangin kan Dan (The Mizoram Land Revenue Act, 2013) pawh kan Amend hial a nih kha. He central Scheme hian nasa takin Mizoram tan bung thar min kaipui dawn bawk a ni, a ti.
Khualzahawm Pu Rochhunga Ralte, Vice-Chairman, SEDP Land Revenue & Survey Board pawhin mitin hian kan ram neih chhunte hi kan hriatchiana kan bel a pawimawh a, kan ram neihte eng atan nge hman tangkai tha ang tihte hi zirchianna tak tak kan neih thin loh avangin a nih tur anga kan chhawr tangkai loh a awm thin a, tun tuma survey kan neih tur hian hlawkna thar leh hmasawnna thar min hmuhtir ngei ka beisei a ni, a ti.
Revenue department ah surveyor an indaih loh vangin hma lak tan dan tur an ngaihtuah uluk hle tih sawiin State dangte tihdan entawnin pawn lam firm an thawh tir (outsource) a ni, a ti a. VC te leh khawtlang hruaitute chu survey hna thawktute tha taka lo thawhpuia lo tawiawm turin a ngen bawk a ni.
Saitual district bawrhsap Pu VL Hruaizela Khiangte pawhin thu sawiin Saitual khawpui chu a hmun a rem bakah a laili a, LR&S in survey neihna tur pilot project model town atan hman a ni chu thil inhmeh tak a ni, a ti a. Survey hi uluk leh finkhur taka tih a ngaih thu sawiin, vawikhat tihsual chuan a pawi thui thin avangin a bul atanga a tawp thlenga tha thlah lo leh tang mar pata hnathawk turin survey nei tura thlan firm te a chah a, DC a nihna ang pawhin a tul a nih phawt chuan theihtawp chhuaha lo tanpui a inhuam thu a sawi a ni.
Modernization of land records hi sawrkar laipuiin a ngaih pawimawh em em bakah Mizoram sawrkar pawhin a ngai pawimawh a, awlsam taka land record en theih tura chhawpchhuah a nih chuan file leh lekha chhah pui pui haileta hun rei tak lak thin kha a reh thei dawn a, hei bakah hian rambuai enfel leh thildang pawimawh pawh awlsam takin a tih theih dawn avangin chak zawka hma lak a nih theih nan SEDP hnuaiah kalpui a ni a, a bul tan nan pilot project angin Saitual khawpui leh a chhehvel khaw thenkhatah hian kalpui a ni a, a hlawhtlin dan azirin district dangah pawh kalpui zel tura ruahman a ni.
Survey & Re-survey hna hi Buannel Geo Solutions & Services in a thawk dawn a, Saitual, Keifang, Rulchawm, Ruallung leh Sihfa khuaahte he hna hi kalpui a ni dawn a, in nei si pass la nei lote, land allotment thar turte, ram survey tawh la regularize lohte, sawrkar ram, kohhran leh tlawmngai pawlte ram leh hmunhmate survey tur a ni ang. Buannel Geo Solutions & Services hi Mizorama Modern Surveying Empanelled Firm awmchhun an ni a, tunlai survey-na hmanraw tha leh changkang ber bera thuam a ni.
