MPCC Media Department chuan nimin khan Aizawl Press Club-ah chanchinthar lakhawmtute kawmin, “Mizoram sum leh pai enkawlna kawnga MNF sorkar talbuai dan hi a thuk tawh em a, kum hnih-khat lek chhunga siamthat mai theih tawh loh tur khawpa dinhmun chhiaa a din tawh avangin an dinhmun hrethiam chin MNF Minister-te chuan finance chungchang engmah an sawi duh tawh lo a. Minister leh MLA tam zawk chu an ngawi thup tawh a ni,” an ti..
MPCC Media department Chairman Dr.Lallianchhunga chuan, “September 14, 2022-a Pu L. Thangmawia MLA leh MNF Legislature Party Secretary ni bawkin Press Conference a nei kha Congress party Press Conference thuken min nemnghehpuina a nih bakah kan thu leh hla min thehdarhsakna a nih avangin a chungah kan lawm hle a. Pu L.Thangmawia khan kum 2019 April 1 leh kum 2022 July 14 inkara nuai 100 chin chunglam bill, sorkar Treasury a thehluh ni la la a pawisa lakchhuah nghalna bill 105 a awm angin a report a. Ni khata Treasury-a lehlan thei, mi thil ti thei bikte bill belhkhawm pawh chengvaibelchhe 591 lai niin a sawi. MNF sorkarin COVID-19 chhuanlama pawisa a harsatna a tawh thu a tlangaupui mek laiin an duhsak zawngte a ruka an lo vur nasat zia chiang takin a lang chho zel a. MNF Party worker-te leh Contractor tam zawkin an hnathawhna bill an lak theih loh lai te, PMGSY contractor tam zawk ten bill vaibelchhe 200 chuang an lak theih loh avanga an hnathawh pawh an chhunzawm theih loh laiin an duhsak zawng Contractor-te contract pek leh bill pek kawngah chuan harsatna an tawk miah lo tih Pu L.Thangmawia MLA thusawi atang khan a lang chiang zel a. Sum harsatna vanga buaina namen lo ramin a tawh laia Contractor an duhsak zualte tana a Vur Kum an thlen tir reng chhan Pu L. Thangmawia’n a sawifiah duh lo erawh pawi kan ti hle.
“Mizoram tana zalenna sualtu inti leh hnam party inti, MNF Party sorkarna hnuaia ni khata Bill lehlan thei zinga che thei ber chu SLT Infracon Pvt. Ltd, Silchar a ni a, an ni hian bill 9 lai chu awlsam takin an thehluh ni la lain an la nghal thei a. Vai company bawk Ratna Infra, Hyderabad leh M/S Bhavya Construction, Silchar-te pawhin an bill 4 ve ve ni khatah an lehlan thei bawk. Pu Zoramthanga fachuam, a vangvat kaipuite ai pawha a duhsak zawk Kamrul-a pawhin Treasury-ah bill 3 a lehlan pui thei a, RTI chhanna atanga a lan danin Kamrul-a bill hrim hrim hi Treasury-ah thla khat aia rei a tang ve ngai meuh lo bawk.
“Hetiang a nih lai hian sorkar hnathawkte chuan tunhma angin a hunah tak hlawh an la thei lo a, sorkarin pension a chhuak mi 1367 te pawisa a batsak pawh Rs. 2,49,87,07,426 (Cheng nuai sing hnih, sang li, sawmriat pasarih, sang sarih, zali leh sawmhnih paruk/ cheng vaibelchhe zahnih sawmli pakua, nuai sawmriat pasarih, sangsarih, zali leh sawmhnih paruk) a tling tawh a, GP Fund an la hleithei hek lo. Hetianga bill thehluh ni a pawisa lachhuak nghal pap pap thei vai company engemawzat an awm lai hian Healthcare bill 28,448 tlingkhawm cheng vaibelchhe 77 chu pekchhuah theih lohin a la awm reng bawk. Kamrula leh Vai company lianten pawisa an hmuh zung zung theih laiin chhungkaw tina cheng nuai 3 sem an tiamnaah Rs. 25,000/- in an sem thei hram a, heng zawng zawng hian MNF sorkarah mipui aiin duhsak hlawh zual – Kamrula-a leh mi tlemte te pawimawh zawk zia a tarlang chiang hle a ni.
“”MNF sorkarin sum leh paia harsatna a tawh nasat dan te, kan leiba a pun nasat dante ngaihtuah chuan hei hi thil mak tak, hriatthiam harsa tak a ni a. Sorkar hnathawk leh mipui nawlpuite mamawh em em bill pek aiin Contractor mi tlemte, an duhsak zawngte bill pek an awlsam zawk tlat hi mipui an zah loh zia tilangtu a ni,” a ti bawk.
