MPCC chuan Vawiin 19.09.2022 (Thawhtanni) khan Golden Hall, Congress Bhavan-ah ‘Siamthar lehna Crusade’ thawh hnihna hun hman a ni a, Speaker Rev. Vanlalzuata Speaker hnen atangin ‘….Nang malsawmna ni ang che……’ tih thupui hmangin Pathian thuchah ngaihthlak a ni.
Rev. Vanlalzuata chuan, Pathian thu hian Politics te, kan Economy te, kan nitin nunphung te a huap vek a ni. Abrahama Pathianin a koh chuan chu midang tana malsawmna a ni. Hei hian Kan Politics te hi a fun vekin ka hria. Malsawmna ni Turin Pathianni mipui te hmangin sorkar min pe thin a. Kha sorkar kha mipuite tana malsawmna ni turin Patjianin min ko va, sorkar tha chu mipuite pawhin mal an sawm let thin a ni, a ti.
Abrahama khan amah zuitu Lota kha ‘Nang i duh duh thlang rawh, tiin malsawmna a ni nghal tih sawi in, a chhe zawk thlang apiangte Pathianin mal a sawm thin a, Inngaitlawmte a chawimawiin mi chapo te a dodal thin, a ti.
Pu Zuata chuan, Tunlaiah Sodom khawpuia Cheng ang main duhamna a nasa hle. Politics, party chhungah chauh pawh a ni lo, ram pumpui mai hi duhamna, sum leh paia duhamna hian min chim tawh a. Thluaka thisen thisen tling chu hlauhawm hle mahse thluaka sum tling hi a hlauhawm daih zawk. Thluaka duhamna a tlingin ram Politics a ti dik loa, kan kohhran hmel a tichhiaa, chhungkua leh khawtlang nun a tihmelhem thin, tih sawiin, Chhiar sen loh neih hnuah pawh hman chawp tlem la mamawh khawpa duhamna hi Mizoramah a thleng mek, a ti.
Rev. Vanlalzuata chuan, Sumin eitur kan lei thei, chaw ei tuina kan lei thei lo. Sumin damdawiin kan lei thei, damna kan lei thei lo, sumin silhfen kan lei thei, mawina kan lei thei lo, sumin Passport leh Visa kan lei thei, sumin vanram kalna Passport kan lei thei lo. Aizawl khawpuia nu leh pa te manganna hi sumin a lei theih loh vek a ni. Corruption, hlemhletna te hi sumin a tihchhuah vek, sumin a tih dam theih loh vek a ni, a ti.
Pawisa chhiarsen loh nei China hausa Jack Ma chuan, hmana nitin ei khawp ka neih lai khan ka hlim daih zawk, a ti tih sawiin, Sum hian min ti nuam lo, a hmuhna dik loa kan hmuh phei chuan min ti hrehawm. A hausakna chhiar pawha kum sawm chhung pawha chhiar sen loh neitu John Davison Rockefeller kha kum naupangte niin thi mai thei dinhmunah a ding a, a sum neihte mite tana malsawmna ni turin kawng hrang hranin a sem a, a neih a semten a hnena lawmthu an sawina thu khan a taksa leh rilru a ti dam a, kum 50 vel a niha thi mai tura ngaih kha kum 90 piancham a lawm thei hial. Midang tana malsawmna a nih kha a damna a ni. Politician hausa chu ruk a ru a nih loh chuan a dik lo. Kohhran rawngbawl hna te, Politics leh ram hruaina kan tih zawng zawng hi mahni rawngbawl lova midang rawngbawl hi Politics chu a ni, a ti.
Midang tana malsawmna nih hi mihring dam chhan a ni. Mahni tanghma ringawt um chu a nung lo a ni. Midang tana malsawmna ni ngai lo chu Pathian fakin ban phar mahse a phar thlawn mai a ni. Pathian duhzawng chu mite ber chunga ti chu ka chunga ti an ni, Lal Isuan a ti. Midang tana malsawmna ni te hi Pathian faka ban phar reng an ni, a ti.
Tute tan pawha malsawmna ni turin Politics kan khel. Engati nge Politics ah hian Pathian thu a nih avanga a len loh? Kan rama thil ninawm tak chu party induhsakna a ni. Huapzo Sorkar kan mamawh tawh. Kan ram pumpui tana malsawmna Sorkar kan mamawh.
Midang tana malsawmna ni turin unau pianpui nih kher a ngai lo, thenawm khawveng leh hmelhriat tha nih kher a ngai lo, kan party mi nih kher a ngai lo. Mizoram pumpui tana malsawmna nih a ngai. Kan ram hian chu chu kan mamawh, dik taka thawha unau in hmangaiha in hmangaih a ngai. Chutiang tur chuan Kohhran aimah hian Politician te hi in tangkai zawk. Congress party hi Miidang tam tak tan Ministry in chelh lai pawhin malsawmna in ni tawh, kha kha a la tawk lo. Midang tam zawk tan, kan ram tan malsawmna in nih a ngai. Tute emaw kan tanpui hian Pathian duhzawng kan ti a ni. Chapona avanga tih kan nih erawh chuan Pathian hnen a thleng lovang.
Ram rorelnaa in duhsakna hi midang te hi Pathianin min kohna a ni. Politician kan nih avangin party dang kan haw ngawt thei lo. Party tin te hian hun kal tawhah tih sual leh tih dik tawk loh kan nei thei. Tunah hian thinlung thar leh siamtharna thinlung puin, midang te tana malsawmna ni tura inbautsaih a tul tih sawiin, ram rorelnaah hian mipuite an zahawm zia hriaa, chung zawng zawng kan tih chuan kan pawl hi Lalpa’n mal min sawm ngei ngei ang, Pathian malsawm tlakin Politics i khel ang u, a ti.
