Central YMA Hall, Tuikhuahtlang Aizawlah vawiin khan Prof. Malsawmliana, Associate Prof. Deptt. of History, T. Romana College leh Assistant Secretary, Central YMA ni bawk Lehkhabu ziah, “Ni leh thla kara lêng” tih chu Lalnunmawia Chuaungo IAS (Rtd.), Chief Information Commission, Govt. of Mizoram in a tlangzarh.
Lehkhabu Tlangzarh inkhawm hi Lalthlamuanna Ralte, Asst. Prof. Dept. of Economics, PUC in a kaihruai a. Rev. Lalfakzuala, Vaivakawn in hunserh hmangin lehkhabu ziaktu, Prof Malsawmliana bakah R Lalngheta, President Central YMA leh Dr. Jennifer Lalbiakdiki, Principal TRC ten thu an sawi a. Lehkhabu tlangzarhtu, Lalnunmawia Chuaungo chuan, Mizo fate tana lehkhabu rotling leh in zirna tham ziah a ni leh, tlangzarh theia a awm chu Pathian remruat a nih a rin thu a sawi a. Hmanlai Mizo Lal tena an ram chin an hauh dan leh ram leh hnam an humhalha an hmangaih thinna chu a zahawm a tih thu leh thangthar tena kan zui zawh loh zia ngaihtuah chuan a zahthlak a tih zia thu a sawi a ni.
Lehkhabu tlangzarh tâk, thlirlawkna hun hmangtu, Dr. Rohmingmawii, Associate Professor, Dept. of History, PUC chuan he Lehkhabu nih phung leh a ziaktu hawi lam nia a hriatte sawiin, Historical content nei tha tak, Historical book ni chiah si lo a, a chhiar tute tana ngaihnawm tak nia a rin thu leh Mizo tawng ngeia hetiang lam lehkhabu thar kan nei tur chu lawmawm a tih thu a sawi a ni. Message strong tak – Ram leh Hnam hmangaihna leh humhalhna lam a nih ber thu a sawi bawk a ni.
Ni Leh Thla Kara Lêng tih lehkhabuah hi Phek 183 niin a ziaktu hian lehkhabu dang sawmli (40) zet a râwn thu a sawi bawk a ni.
