Vawiin khan Chanmari Sub Centre, Lungleiah naupang kum nga hnuai lam zenghri danna pek runpui National Immunization Day 2022 (NID) chu Lunglei DC & Chairman, District Task Force on Immunization, Pu Kulothungan A in a hawng.
Hawnna inkhawm Lunglei CMO Dr LC Liana kaihhruaiah Lunglei DC Pu Kulothungan A chuan naupangte hriselna ngaih pawihmawh saka a hun taka hri danna lak tir a pawimawh takzet thu sawiin District chhunga nu leh pa te pawh an fate zeng hri danna la pe lo an awm anih chuan he hun hi ngai pawimawha pek tir vek turin a ngen a. Covid-19 hrileng avanga harsatna nasa tak kan tawh karah H&FW Department hotute leh thawktuten theihtawp chhuahin an hna tlin takin an thawk a, an chhuanawm takzet a ni tiin an chungah lawthu a sawi bawk.
Dr. Lalrinthangi DIO, Lunglei chuan report pe in Lunglei District chhunga SDH/CHC/PHC/MC ah zenghri danna pek tur hi naupang 14899 niin booths 224 atanga pek chhuah a ni ang. Centre hrang hrang a hri danna la lo te pawh in tina kal in hri danna pek an ni ang a,hemi bakah hian zin veivak te tan transit point pathum (3) siam niin MST, Venglai, Sumo Stand, Venglai leh Sumo Stand, chanmari ah te hridanna pek a ni ang. Covid positive vei lai te chu hri danna hi an pek theih lova, amaherawhchu discharge an nih veleh pek nghal theih an ni. Zenghri danna hi Myanmar atanga raltlan refugee camp pali (4) awmna Cherhlun PHC, Hnahthial CHC, Thingsai PHC leh Tawipui PHC ah te pek tum a ni bawk.
