Central YMA in NHIDCL-te hnathawhna hmun tlawh

Mizorama hmasawnna rulhrel lian tak tak thawktu, National Highway Infrastructure Development Corporation Limited (NHIDCL) te hnathawh lai mek viltu tura Central YMA in a din Monitoring Committee te chuan vawiin kham Zemabawk leh Thingsulthliah inkara NHIDCL hnathawhte a hmunah enin, an tlawh chhuak a. NHIDCL Mizorama an hotu ber Virendra Jhakhar, Executive Director hovin, project (Kawngpui) design-tu te, Contractor te leh Third Party Monitoring Team ten an kalna apiangah zuiin an lo dawng sawng a ni.
Kawngpui siam meka an kawng laihna leivung an paihna hmun leh an paih dan te thlirho a ni a. Leivung dâwlna an siam te, Culvert an siam te leh Kawngpui dâwlna (retaining wall) an siam mek te pawh enhovin Central YMA team-te chuan NHIDCL in leivung an paihna hmuna phalna an neih ang ang te chu a copy pe turin an hriattir a. Phalna pek an nihna hmun lovah chuan leivungte hi paih tawh lo turin leh an lo paih tawhna zawng zawngah pawh Leivung paihin Environment a tihchhiat lohnan a dâwlna siam vek turin NHIDCL hotute hi an hrilh bawk a ni. Tin, an lung hman tha lo nia an hriatte pawh a tha chauh hmang turin Central YMA team-te hian an hriattir bawk a ni. Central YMA ngenna hi NHIDCL te hian tha taka tihhkawhtlin an tum tur thu leh hun remchanga enho leh turin an sawm nghal bawk a ni.
Kawng tih zauh nana kopang lam an laihte min tur vennana tunlai Technology thar Hydro-seedling & Mulching hmanga thlai, thing leh mau an chin mek te pawh enho a ni bawk a. Tin, ram neituten Compensation an hmuh tur ang ang te rang taka an hmuh theih dan tur te hmakak dan tur sawiho a ni bawk.
NHIDCL tena Silchar leh Aizawl inkara four lane kawngpui an laih leh dawnah chuan Spoil Bank tur felfai taka buatsaih lawk vek a, Leivung dâwlna te siam hmasak vek an tum tawh thu NHIDCL hotute atang hian ngaih thlak a ni bawk.
Central YMA Monitoring Team te hi Committee Chairman Lalhmachhuana, Central YMA Vice-President ni bawk hovin, Prof. Malsâwmliana, Monitoring team Secretary leh Central YMA Asst. Secretary bakah member-te atangin Tv. Zochhuana CEC, Er. Lallawmzuala Pautu CEC leh Er. K. Lalrimawia CEC te an tel a ni.