Mizo National Youth Front Headquarters bul tuma Aizawl City huam chhunga MNYF Block hrang hrang tlawh chhuah programme chu hman zawh niin, nimin khan kharna hun chu MNYF Headquarter President Er. Lalrinawma Tuikum Bialtu MLA hovin Aizawl North Block MNYF nen AH & Vety Rest House, Selesih-ah hman a ni.
He hunah hian MNF Ṭhalai President Er. Lalrinawma MLA Tuikum Bialtu ni bawk chuan thusawiin “MNF party chuan hun harsa leh khirh vawi tam tak a lo paltlang tawha, ramin zalenna sang ber a neih theih nan theihtawp chhuahin a bei tawh thin a. Harsatna hrang hrangin a tuai hriam tawh a nihna hi Pathian pawhin a hre reng a nih a rinawm a, ramin harsatna a tawh laiin mipuite thlamuan turin kohchhuahin a awm ṭhin a, tun huna ramin harsatna kan tawh hrang hrangte a lo hmachhawn danah pawh hian a fakawm tak meuh a ni,” a ti. Kum 2023 MLA General Election lo awm turah pawh ṭhalaite chu theihtawp chhuah turin leh Headquarters zai ngai taka kal thiam turin a chah. Mahni chanvo leh tih turte hriat chian a pawimawh thu leh Hnam party ṭhalai kan nihna hre renga engkimah ram leh hnam tan theihtawp chhuah zel tura a duh thu a sawi bawk a ni.
He hunah MNF Ṭhalai Vice President Pu Lalzahawma Khiangte pawhin thusawiin Opposition party-te chu Zoram hian eng harsatna nge a tawrh tihte, ngaihtuahna nei lo leh vei lek lova lalna leh thuneihna ringawt buaipuia ram harsatna denchhena politics-a hamṭhatna tel tum rana bei ngar ngarah Zoram mipuite hian an ngai tawh a. In sawiselna ringawt te, phunchiarna ringawt te, ṭawngkam mawi lo tak taka Social media a inṭawngkhum te, thuhluite phawrh chhuaha Zoram mipuite-ah in hampuar an tum danah te hian politics role mawi tak hmuh tur a awm lo a. Opposition party-ah beiseina thar neihna chhan tur pawh a awm chuang bawk lo. Tuna kan MLA leh Minister-te’n an bial ṭheuha theihtawp chhuaha hma an lak dante leh an chet dante kan hmuh hian an fakawm em em a. MLA fund pawh mipuiah an hmang ṭha hle a, Bial mipuite tan nu leh pa nih an tling a, Minister, MNF MLA-te leh kan Councillor-te mahni Inah tawmim mai lovin bial mite harsatna leh manganna lakah an ngaihven ṭha em em avang ringawt pawh hian MNF party hi a sawrkar leh ngei ang tih a rin theih a ni, a ti bawk.
He hunah hian AMC Mayor Pu Lalrinenga Sailo leh Aizawl North-I MNF Block President Pu Lalrinmawia te hnen aṭangin fuihna thu ṭha tak tak ngaihthlak a ni a. He hun hi Pu Lalhmingthanga, President, Aizawl North-I MNYF chuan kaihruaiin Catherine MS Dawngliani’n hun serh a hmang a ni.
