Aizawl September 25, 2022: Inrinni khan Pang Zirlai Pawl te chuan Aizawl Central Hall, Venghluiah Fresher’s Social cum Meritorious Students’ Felicitation Programme – 2022 an hmang a. He hun hi Lalduhoma, ZPM Leader chuan khuallian niin a hmanpui.
ZPM Leader chuan, “Pang hnamte hi Mizoram luah hmasa pawl zinga mi niin an lang a, kan pi leh pute hunlaia an tawng hmanah te, an thu leh hla, tun hnua ‘Tawng Upa’ kan tihah te hian ‘Pang’ tawng te pawh a tel a, hei hian hmanlai chuan kan pi leh pute nen pawh lo khawsaho a, chengho thin an ni tih a tichiang hle a ni. Zohnahthlak hnam hrang hrangte hi a inthendarh zawnga kan awm chuan tih tham lohah kan chhuak dawn a. Kan vai hian unau vek kan ni a, midang nen khawsakhona kawngah a inla hrang zawng ni lovin inpumkhat zawnga kan kal a ngai a, kan hnam hi ropui taka a dinchhuah theihnan theihtawp kan chhuah a tul a ni. Zohnahthlak hnam hrang hrangte nunphung, incheina leh thu leh hlate hi kan hnam a chawimawi a, a ti ropui a, a ti hausa a ni,” a ti a, Pang hnam hi Bawm leh Tlanglau te nen inhnai tak niin, in enhrang lo turin a chah bawk a ni.
Lalduhoma chuan, Pang zirlaite chu theihtawpa zirna kawnga tan la a, eirukna dopuiah sawmin, “Zirna hi ram leh hnam thanlen zelna kawngah a pawimawh em em a, zirna kawngah theihtawp chhuah ula, kawng hrang hranga hlawhtlinna in chan ngei theih nan duhsakna ka hlan che u a ni. Eirukna (Corruption) hi kan ram leh hnam hmelma, min tichhetu a ni a, vawiina zirlai lo pungkhawm zawng zawngte eirukna dopui atan ka sawm che u a ni,” a ti bawk.
Pang Zirlai Pawl Fresher’s Social cum Meritorious Students’ Felicitation Programme – 2022 hi Hlimthangmawia, Vice President-in a kaihruai a, hemi pual hian Pu Lalduhoma, ZPM Leader hian Rs 20,000.00 a hlan a ni.
