Kalphung thar a harsa lo : PL Liandinga

Vawiin khan ZPM chhung inkhawm hun hman a ni a, he hun hi F. Rodingliana, Consultant chuan kaihruaiin, PL Liandinga, Consultant – in thu sawiin, Lalthansanga (Chatea) Ex-MLA, Vice President chuan ZPM zawm thar mi 30 a lawmlut bawk.
PL Liandinga chuan, “Sawrkarna chang turin kan inbuatsaih a, Pathian leh mipui zarah sawrkarna chan ngei pawh kan inring a, kan sawrkar chuan kalphung tharin kal kan tum ang tih chu kan hre vekin a rinawm. Kalphung thar hi a harsa lo va, tuna kan sawrkarin a tih tam tak hi ti ve lo ringawt ila kalphung thar chu a ni mai. Mipuite hlawkpui chuan loh tur – Mau te, kawngchhawng te, leiverh te, nuai 3 (thum) sem te, board siamchawp enkawlzui loh te bakah thil dang tam tak, mipui pawisa hekna tur tihbo a ni turte pawh kalphung thar a ni,” a ti.
PL Liandinga chuan, “Kamrul-a leh Pu Zoramchhana tel lohna sawrkar, restricted tender ringawt hmanga rorel lohna sawrkar hi mipui tan hian hmuh chakawm leh kalphung thar a ni thei a, heng thil hnawksak awmsa tih chhunzawm loh bakah, tunhmaa Mizoram sawrkara la awm ngai lo, Chief Minister-in works department lian a chang lo tur te, Val Upa Council uapna hnuaia sawrkar a kal tur te, ZPM sawrkar chhunga MLA hlawh a pung lo tur chiangsa te, Chief Minister leh Minister te motor kawl tihtlem te pawh kalphung thar nasa tak a ni dawn, thlai thar leina budget-a a awm tur te, khaw hrang hranga Village Development Council din tur te, MLA/Minister te mimal car tur sawrkar-in a lei tawh lo turte, heng zawng zawng kan tih a, dikna nena ro kan rel chuan Mizoram hi a thawveng sawt ngei ang,”a ti bawk.
ZPM Consultant chuan, “Kan inbuatsaihna atana pawimawh tak tur chu rinawm tura in Baptist hi a ni a, rinawmna nena kan tih si loh chuan kalphung thar hian awmzia a awm lo thei a ni. Kalphung thar chhungphum pawimawh ber tur chu sum ngainat lutuk loh tum phawt a ni a, sawrkarna kan lo chang ve a nih pawhin kan hotute hian sum hi ngaina lutuk lo sela, kan workers zawng zawng leh kan pawl khaidingtu zawng zawng hian sum hi ngaina lutuk lo ila a tha hle ang. Kan sawrkar hrawn tawh zawng zawng hi demna kan nei a nih chuan a bul chu sum ngainatna deuh vek a ni a, hemi lakah hian insum turin kan inchah a ni,” a ti bawk.