Lunglei District chhung World Bank kawng 100Km-160KM Kanghmun – Lunglei kawng thawm that hnathawktu Bhavya Construction te hnathawh chungchang ah nimin khan Lunglei Bawrhsap Kulothungan A, IAS chuan Lunglei Media te a kawm a. He hunah hian Bhavya Construction aiawhin Horendra Kumar Barua, Project Manager lo telin, he kawng hi October 2022 chhung ngeia repair hna an zawh fel tur thu a intiam a ni.
Kulothungan A chuan Lunglei District chhung World Bank kawng thawm that hnathawktu Bhavya Construction ten an lo buaipui tawh chu a chhiat em avangin sawrkar in dan a neih Disaster Management Act hmangin Bhavya Construction te chu Lunglei DC hma a in lan tura koh an nih thu a sawi a. Mipui, Lirthei neitu leh District Administration te lungawina khawp a kawng siam tha tur leh a hun chhunga kawng thawm hna an zawh fel a tul thu a sawi a, hun tiam chhunga an zawh loh chuan Mizoram State chhunga hnathawk theilo tur a black list a nih theih thu a sawi bawk.
Bhavya Construction aiawh in Horendra Kumar Barua, Project Manager chuan an hnathawh dan chungchang sawiin kawng thawm (Resurfacing) hna hi 24.4.2022 khan zawh a ni a, defect liability (an kawng siam chhe leh repair hna thawh) hi 31.3.2023 thleng a nun thu a sawi a. Fur ruahtui vangin kawng siam hi a chhe nasa hle a, kawng chhe thawm that hna hi kalpui mek a ni a, team pathumah in then in kawng khuar zual lai te chu motor tlan theih nan hnawh mek zel a ni. He hna hi October 2022 chhung a zawh hman ngei an tum a, an intiam a ni. Mizoram sawrkar chuan Robin Lalrinawma, S.E, PWD E in C office, Aizawl kaihhruaiin study team kawng chhiat chhan zirchiang turin a din a, report an thehluh hunah kawng chhiat chhan hriat a ni ang, a ti.
