Aizawl New Market-a sumdawng pawl hrang hrangte chuan bazar thiah tak chu sak mai a la nih loh avangin sumdawng mi sang 2 chuang te chu an mangang tawh hle a, sorkar chu hma la va turin an phut.
New Market Joint Sumdawng Association (NMSJA) te chuan vawiin khan thuthar thehdarhtute sawmin an harsatna hi an sawipui a, new market huam chhunga awm foreign lane tih thin, tuna Aizawl City centre (Annex) lo ni ta, dawr 128 vel awmna chu kum 2018 atrang khan thriah tran a ni a, pawisa awm sa kum thum chhunga sak zawh tur a tih a nih thu sawiin, hetihlai hian building satute hian an sakna senso pawisa sorkarin a pek thrat loh avangin hna an thawk chak lo hle, tiin, sorkar chu building sak mek sa zo thuai tura hma la turin an ngen tih an sawi.
NMSJA chuan dawr 1000 chuang awmna New market building, tuna Aizawl City Centre tih tak chu MNF in sorkarna an chan hnu atanga hun rei lo teah thriah tura hmalak a ni tih leh sumdawngte pawh in sawn chhuak tura hriattir an nih thu leh kum 2019 krismas chu awm tir tura an dil angin hemi kum hi chu an awm tluan tih an sawi a, kum 2020 khan hripui leng chu remchangah hmangin chhuak tura na taka an nawr thute, kum 2020 july thlaah thiah tran a nih tak thu leh sumdawngte an awm lailawkna tur ruahman ni mah se dawr siamna tlak a ni lo thung tih an sawi a, main building thiah tak sak thatna tur sum chu UD&PA kutah a awm vek tih leh January thla khan market building sakna atan hian tender chhuah anih dawn thu sawrkar lam chuan sawi mahse tender an chhuah lo a, UD&PA changtu Deputy Chief Minister chuan March thlaa session ah kum thara tender tur anga a sawi chungin tun thlengin tender chhuah a la ni lo tih an sawi a, sorkarin hma a la chak lo lutuk chu an hrethiam lo tih leh building pahnih thiah taka eizawng chhungkaw 2219 te chu an mangang tawh hle tih thuthar thehdarhtute an hrilh.
NMSJA president R.Lalthangzama chuan, pawisa a awm tih sawi reng chunga an awmna tur sak a la ni lo chu sumdawngte hmuhsitna, rahbehna leh zah lohna lian takah ngaiin, an ngaithiam thei lo tih a sawi a, sorkar kar nan office kai tur dan emaw tha rum thawh zawnga che ri lo a, smart taka sorkar chu nawr duh mah se an dinhmunin a zir loh miau chuan an duh loh dan anga an chet hun pawh a la awm thei tih a sawi a, tender chhuah chungchangah pawh thu an tiam ang chu an ti hlawhtling hlei thei lo tiin, pa chang an ni a, khaw eng pawh an zah lo em ni, keimahni hi engahmah min ngai lo a nih pawhin khaw eng tal hi zah se, heti ngawta in namnul hi na kan ti a ni, a ti bawk.
