Serchhip Zawlpuiah Sazu hrai runpui neih a ni

Vawiin khan Serchhip Agriculture Department bultumin Zawlpui ah Sazu hrai runpui neih a ni.
Zawlpui zauva leilet neitute hnenah hian Lalrinawma, Asst. District Agriculture Officer (ADAO) Serchhip chuan Sazu tur hmandan leh hrai dan a takin a zirtir hmasaa, sazu tur hi loneitute hnenah sem nghalin a huhovin a hrai runpui hi an nei zui ta a ni.
Tunlai hian Mizoram hmun hrang hrang a buh hmunte Sazu in a bei mek a, Raw Tam (Rawnal) vanga Sazute hi lo hluar ta nia ngaih a ni. Heng sazute hian Serchhip District chhung khaw thenkhata Tlangram buhte seng tur awm lo khawpin an lo suamsam sak tawh a, tun hnai mai khan Serchhip Zawlpui Zau Leilet a thar rang buhte pawh Sazu hian an beih ve leh tak avangin buh hmin chho zel tur chhan theih beiseiin Sazu hrai runpui an nei ta a ni.
Sazu hrai nan hian Sazu tur chi hnih Zinc Phosphite (Sazu tur dum dip) leh Roban (Sazu Cake) te hman an ni a. Zinc Phosphite (a dum dip/phut) hi Buh kan hmuiah phul a lehkhaa tuamin Mau bur emaw Changel kawr khawrpum chhunga thun hnuah Sazu ei tura tawktarh tur a ni. Tur pahnihte hnathawh dan chu Zinc Phosphite hi sazu in an ei atanga darkar 4 hnuah an zeng thin a ni. Roban (Sazu Cake) hi chu an ei veleh an kawchhungah thisen chhuak (Internal Bleeding) siamin an thihpui mai thin thung a ni.
Serchhip Zawlpui Zau a Field Management Committee(FMC) hruaitute chuan kum dangah Sazu avanga harsatna an la tawh ngai loh tawh thu leh kumina hetiang lo thleng hi an tan thil thar anih thu an sawi a. Agriculture Department ten an harsatna hriaa Sazu Hrai runpui rang taka an neihpui chu lawmawm an ti hle a ni. Buhte an hmin chhoh mai dawn avangin Sazu laka an him ngei theih nan sawrkarin ngaihsak zui zel se an duh thu an sawi bawk.
Serchhip Zawlpui Zau ah hian Chhungkaw 68 chuangin buh hmun an siam mek a, kumtin Buh Phur 7000 chuang an thar chhuak thin a ni.