Gas siamna khurah Pu K. Lalmawizuala a tlahlum

K. Lalmawizuala, (41) H/o Lalnuntluangi, Sihphir Venglai chu Thawhlehni tlai dar 3:00 vel khan ‘Accident’ avangin a boral a, vawiin khan vuiliam a ni.
K. Lalmawizuala hi Thawhlehni khan VC hnuaiah chawhma lam a inhlawh a. Thudawnna in a sawi danin Ina a haw phei hnu, tlai dar 2:30 vel khan an huan a awm an nu hnenah huana a kal ve dawn thu phone in a hrilh a. Dar 3:10 velah an nu hian phone letin a chhang ta lo a ni. A phone leh chapal hi an kawmthlang Pi Biaki te Gas khur bul velah an hmu a, Gas khura a tlak rinna an nei lem loh avangin a bul vel te an zawng kual thuak thuak a, an hmu lo.
Tlai chaw eikhamah a lo la haw loh cheu avangin an nu ngaihtha lo hian a ngam tlak zual pahnih khat sawmin an kawmthlang lamah an zawng a. Gas khur pawh hi rinhlelh thilah mau in an hawlh nghe nghe a ni.
Zan lamah kokim deuh zawkin an zawng nawn leh a. Rinhlelhna lian tak an neih avangin Gas khur pawh hi mau sei zawkin uluk zawka an hawlh nawn leh hnuah zan dar 10:00 bawr vel khan a ruang hi an hawlh fuh ta a ni.
Gas khur hi a thuk a, Bawng tui tur an dah hnem lai tak niin, a petek palh a tla lut niin an ring. Gas khurah hian Pu Lalbiakzuala leh Tv Lalthachungnunga te unau hrui a inkhai thla in an liluh a, ruang hi an zu la chhuak ta a ni. A nupui leh a fate mipa 1 leh hmeichhia 2 a kalsan a ni.