Vawiin hian MPYCC chuan Deputy Chief Minister Pu Tawnluia Office-ah lehkha thehlutin, chhuanlam siam tawh lova Aizawl khawpuiin tui harsatna nasa tak kan tawh mek hi buaipuia chingfel vat turin Deputy CM hi phut a ni.
Lehkha thehluh chhan sawiin, “Aizawl khawpui bialtu MLA 11 laite hian Aizawl khawpui tui harsatna an auchhuahpui rin a nih laiin, thawm engmah an nei lo a, MLA 11 te hian an vei tawk lo a ni. Hei vang hian Congress Thalai hian hma kan la a, kan bawhzui zel ang,” MPYCC President Dr. Lalmalsawma’n a ti.
MPYCC lehkha thehluhah chuan, “Aizawl khawpuiin tui harsatna a tawh apiangin, PHED chuan chhuanlamah; Power Supply mumal loh vang tih te, ruah tui tlak tlem vang tihte leh khawl chhiat vang tihte leh adangte an siam a. Mipuiah hmaiphih nan an hmang thin. Tun tumah hi chuan hetiang taka Aizawl khawpuiin tui harsatna a tawk ta hi ‘chhuanlam’ siam tawh lova rang taka i chingfel ngei kan phut tlat a ni,” an ti.
” MNF party ten sorkarna an chelh hnu leh PHED i chan hnu hian tui harsatna hi vawi tam tak MPYCC hian kan lo auchhuahpui tawh a. Aizawl tui lak Tlawng lui te pawh a hmunah tlawhin, Public Health Engineering Department (PHED) Engineer-in-Chief te pawh a pisa lamah tui harsatna sutkian a nih theih nana hma la chak turin kan kawm tawh nghe nghe,” tiin lehkha thehluhah hian ziah a ni bawk a.
“Tun dinhmunah Mizoram khawpui ber Aizawl hian tui harsatna nasa tak a tawk leh ta a, he harsatna hi a rang lama sukiang turin kan phut che a. Mizoram khawpui ber Aizawl khawpui hian thal lai a ni emaw, fur lai pawh ni se tun MNF Sorkar chhung hian tui harsatna nasa takin a tawk chho ta reng mai a. Sorkar hmasa harsatna lian awm ngai lo kha tunah chuan tui sem thlengin a mumal thei ta lo,” tih a ni bawk.
“Mipui harsatna au aw chhang thei lo khawpa i Department chan i enkawl zo lo a nih chuan, i Department chan PHED pawh hi midang kutah dah ngam turin kan phut bawk che,” tiin MPYCC lehkha thehluhah chuan tarlan a ni.
Dr. Lalmalsawma chuan lehkha thehluhah hian New Market, Aizawl building thiah sak that loh chungchang tarlan tel a nih thu a sawi a, “New Market, Aizawl main building kum 2020 July thlaa thiah daih tawh, kum hnih a pumhlum hnu pawha a satu tur zawnna Tender chauh pawh tihchhuah theih loh reng hi veiawm kan ti hle a. Hei vang hian Congress Thalai chuan September ni 3, 2022 khan Bazar pui hi kan tlawh nghe nghe a, September ni 22, 2022-a New Market main building sak nana Letter of Acceptance sorkarin a pe hi lawmawm kan ti a. A sakna pawisa chungchang leh hmalakna kal zel hi kan enzui zel dawn a ni,” a ti.
