Aizawl, 30th September, 2022: Vawiin khan ZPM General Headquarters hruaitute pualin Ṭawngṭai Retreat thawhhnihna Tourist Lodge, Chaltlangah neih a ni. Retreat hi Rev Dr K. Thanzauva, Vice President leh Pu F Rodingliana, Consultant ten kaiihruaiin Pu Lalduhoma, Leader leh Upa C. Zairemmawia, Dintharlehna Team Speaker-in thusawina hun an hmang a ni.
Pu Lalduhoma chuan, “Corruption chungchangah thlemna awmna hmuna ka awm ve chhungin thlemna ka tawk ngai lo a, ram hruainaah pawh ka tawk lovang, hemi chungchangah hi chuan ka inring tawk a, ram mipuite pawh min ring tawk turin ka ngen a ni. Tun sawrkar angah hian hruaitu nihna thlakhlelhna pakhatmah ka nei lo. Nehemia’n Pathian tihna avangin hengte hi ka ti ve thei lo a tih kha keini pawh zawhna chhanna anga chhang tura tih kan ni mekin ka hria. He chhanna chhang tur hi mipui chi nga kan awm; ka chhungte, kan VUC te, kan party unit atanga headquarters hruaitu te, sawrkar hnathawk te leh mipuite kan ni,” a ti a. “Kan chhungkua kan inhlan a, he zawhna hi ka nupui fanau ten min chhanpui dawn a ni. Kan VUC-ah rinna ka nghat tawk a, an mitmei vengin sawrkar leh party kan kaihruai ang. Kan sawrkar hrawn tawh hruai khawlo tu chu ruling mipui an ni ziah, chutiang duh tawh lo kalphung thar duhtute kalkhawm kan nih avangin party mipuiten he zawhna hi kan chhang dawn. Kan ram sawrkar hnathawkte thil dik lo tih duh lo thahnem tak an awm, ‘lui hnar atang hian i fim tlang teh ang u’ kan tih chuan sawrkar hnathawkten an duh ang. Mipui nawlpui pawhin kan rilru sukthlek tihdanglam a ngai, kan ramah political revival a thleng mek a; sawrkar tha, dik leh chak duhnain mipui an tuihal a ni. Ram vei mi, NGO leh kohhran tha tak tak kan nei a, ram rorelna dik hi pathian malsawm duh zawng a nih avangin mipuiten kan zavaiin he zawhna hi kan chhang dawn a ni. Zoram tundin thar lehna turah hian ‘ka thlarau zawkin le’ tih hi a tawkin ka hria. Kawng tinrengah siamthatna kan mamawh a, chung zawng zawng ti tur chuan Pathian chakna ringin huphurhawm engmah a awm lo. Kan ram tihdamlehna turah hian Pathian hmanruate kan ni thei. Pathian pawhin min tuaihriam nasa hlein ka hria; kan tih theihloh hmasawnna min pek nasat zia te ka ngaihtuah a, amaherawhchu a duhloh zawng chu hriak a thih ngei pawh a kalsan a, chuvangin kal sual theihna lakah kan fimkhur a tul hle,” a ti a.
ZPM Leader chuan, “Engvanginnge sawrkar hi kan chak viau? kan thiltum nena enin kan rilru a thianghlim tawk em? Sawrkar tawhte tih dan kan mitthla a nih chuan kan sawrkar a tulna hi ka hre lo reng reng. Chuvangin, kan ram maichamah kan inhalral a ngai, chumi atan chuan tu party emaw chu kan inhlan a ngai a ni. Hei vang hian, a ram leh a felna zawng hmasa tur kan ni a, chumi avanga a pek belh thlir tur zawk kan ni. Kan tana tawkin malsawmna chu Pathianin rem a tihchin min pe em em ang; kan hma mite ang bawrh bawrh kha chuan kan ti tur a ni lo. Mizoram a zau lo a, mihring pawh kan tam lo. He kan ram tungdingleh tur hian kan tih theih chu mahni inphal, inhlanral ngam hi a ni. Chuvangin, Pathian duhzawngah ding nghet ila, inringtawk takin hmalam panin i kal ang u,” a ti.
Upa C Zairemmawia chuan, “Kan thiltih ni lo, kan tihchhan thinlung hi Lalpan a en a ni. Vawiin hian ZPM chauh hmaa thusawiah ka inngai lo, kan rama political party zawng zawng worker te hi thil ti dik lo tu ber kan ni, hotute nawr dik lo tu te pawh kan ni. Kalphung thar kan tih rual hian keimahni kan thar em tih ngaihtuah a ngai. Kan rama political party te hian mipui beidawngte beiseina siamsak turin tih tur kan nei a ni. Dan pawisa lo tu te tawngtaina hi chhan a ni ngai em ni? A ṭawngṭaitu thiltih aiin a ṭawngṭaitu thinlung a pawimawh zawk. Rilru siamfel hmasain Lalpa hmaah i ding ang u. Tuna kan kalphung hi thlak kan duh chuan dikna avanga tlin loh huam kan nih a ngai; kan tih dan kalphung a thar em, khawilainge a thar lai chu? Thil thlak danglam tur chuan huaisen a ngai. Kan rilru leh thinlung Lalpan a en ang a, malsawm tlak chu mal a sawm ang. He ram hmangaihna thinlung thar kan put chuan Lalpan a hmu ang, chu chu keini aiin a chak zawk. Ṭan kan la tur a nih rualin Lalpa duhzawnga kan tih phawt chuan Lapan hna a thawk ang. Eng rilru pua tawngtai nge kan nih? kan rilru leh thinlung put-hmang azirin Lalpa a lungawi ang. Lalpan a zawn thin, a lama rilru dik tak putu a hmuh hunah chuan a chakna tihlan a duh a ni. Sawrkar tawh worker te tih ang tih ve kan duh avanga phur mai kan ni em? Chutiang tihloh chu khalphung thar ani mai lo em ni? Nehemia chuan Pathian tihna avangin ka ti ve thei lo, a ti mai. Party worker ten hlawk kan duh reng tawh a nih chuan, eng system mah hi a fuh lo ang tih hi party zawng zawng te hnenah ka sawi duh a ni. Chutiang lak atang chuan kan danglam ngam em? Lalpan thinlung a en dawn. Thinglung thar insiam ang u. Pathian tihna avanga thil tha lo ti ve thei lo, thlahte thleng pawha tlo tak, Lalpan a humhim duh mihring ni turin inbuatsaih ang u,” a ti.
