Vawiin September 30, 2022 (Zirtawpni) hian kum 2023 General Election lo awm tura Congress Party Manifesto pakhatna chu Golden Hall, Congress Bhavan, Aizawlah tlangzarh a ni. Manifesto tlangzarhna inkhawm hi Pu Ronald Sapa Tlau, ex MP, Vice Chairman, Manifesto Drafting Committee-in a kaihruai a, Pu Lalrinmawia Ralte, Ex Minister, Secretary, Manifesto Drafting Committee-in Manifesto sawifiahna hun hmangin, Pu Lalsawta, President MPCC-in Manifesto hi a tlangzarh a ni.
Pu Lalsawta chuan, “Kan Manifesto hi tih hlawhtlin theih vek a ni a, tih hlawhtlin theih loh tur engmah Manifesto-ah kan dah lo. Pathian leh mipui zara kan sorkar theih hlauh chuan hemi hmang hian Mizoram hi ram nuam, him leh ram hausaah siam kan tum a ni. Ram changkang te’n an neih ang bawk ram kan nei a, a dika kan kaihhruai chuan thunun nuam tak, mipui kan nei bawk a. He hmanrua pahnih hmang tur hian enkawlna (Efficient Management & Dynamic Governance) kan nei ang a, hetianga hlawhtling ram tam tak an awm a ni,” a ti.
“Sorkarin loneitu te, kuthnathawk te, kan ṭhalai rual te’n eizawnna ngêlnghet an neih theih nan kan pui ang a. Mi tinin mahni eizawnnaa kan bur char char a, kan ram hi taima, thawkrim leh ṭangte dinchhuahna rama kan siam chuan vawiina kan khawtlang nuna harsatna (Social problems) tam tak hi a kiang dawn a ni, tih sawiin, Eizawn nana kan thar/vulh chhuah leh chûng hmanga eizawnna kan inthlunzawmna Supply line rintlak kan neih chuan hna thawh tur hi a tam hle dawn a. Hemi atan hian Thar leh Vulh tam a ngai a ni. Chutiang tur chuan- (i) Thlai, thei leh ran vulh te uar rawn bik neih leh (ii) a hmun bik ram, Region, District kan neih a ngai a. Hmanrua atan Contract Farming, Cooperative Societies, PACS, SHG, leh Micro, Small and Medium Enterprises (MSME) te hmang turin Central sorkara- Ministry of Cooperative Society, Ministry of MSME leh Ministry of Food Processing Industry te hi State sorkar hian kan hmang ṭangkai ang a. State sorkar nen sum leh remruatna ṭha hmangin ṭang te a pui ang a, a ṭul angin dan (Law) a siamin dan hnawk a thian fai bawk ang,” a ti bawk.
Pu Lalsawta chuan, Mizoten kan chapona kan kalsan a hun tih thu sawiin, “Service Sector hi Mizo te thiam leh zeina zawng tak a ni a. Kan ram chhungah leh ram dangah kan ṭhalai te’n hna thawkin ram danga thawkte phei chuan an Remittances (Dollar, Pound, Euro) tam tak a zarah India ramin Foreign Exchange thlengin a pui dawn a ni. A pawimawh ber hial pakhat chu Mizo mipui hian Company emaw hotute hnuaia thawk thiam turin kan chapona (ego, pride) hi kan kalsan a hun a ni,” tih sawiin, Congress Manifesto No. 1 hi a hlawhtlin theih nan Mizoram mipuite ṭanpuina leh thlawpna ngênngawl takin ka ngen a ni,” a ti bawk. Congress Party Manifesto hi 2023 inthlan hmain a khat tawka tlangzarh thin tum a ni.
