Vawiin ni September ni 30, 2022 Zirtawpni hian Mizo Hnamrunah chhung inkhawm neih a ni a, he hunah hian Pu Lalchhandama Ralte, Minister leh MNF Adviser ni bawk chuan thusawiin, “MNF hi a dintirh atangin a thuthlungah a la ding reng a. Khawvel hmun hrang hranga Zofate tan a ding zel dawn a ni,” a ti. Chin Community of USA ten khawmpui an hmannaa a kal chungchang report leh Ram leh Hnam tana kawng hrang hranga hma a laknate a sawi bawk.
Pu Chhantea chuan, Chin Community of USA ten khawmpui an hmannaah, khawvel hmun hrang hranga Zofate tan Pa nih tlinga an hriat avangin khuallian atan Mizoram Chief Minister an sawm a, rokhawlhna avangin a aiawha a kal thu a sawi. America rama Zofate chu Mizoram sawrkar leh mipuite chungah, Myanmar rambuai avanga raltlante kan dawnsawn leh tuamhlawm danah thinlung takin an lawm a. Chief Minister-in raltlante thlavang na taka a hauh vangin, MNF chungah an lawm hle a ni, a ti.
Education Minister chuan, raltlan naupang sikul kal rual thahnem takte tan a thlawnin sawrkar sikulah uniform leh zirlaibu te pek vek an ni a. Tha takin zirna an dawng a, matric exam hmabakte tan pawh ruahmanna siamsak niin, mi 28 lai an passed a ni, a ti. Kan ram education-in hmalam a pan zel a, mipuite sawrkarah rinna an nghah avangin sawrkar sikula lut an pung zel a, Samagra hnuaia hnathawk te hlawh tihpun a ni ta chuan chhungkaw tam tak te sawrkar chungah an lawm hle a ni, a ti bawk.
MNF Adviser chuan, US sawrkar hotute hnenah raltlante hamthatna tur kawng hrang hranga hma a lak thu a sawi a. Myanmar raltlan te tana sawrkar leh mipui hmalakna chu USA hruaitute pawhin an lo hriat thu a sawi bawk. America mipui leh thalaiten darkar bi a hna an thawk chu tha a tih thu leh kan ramah kalpui ve theih atan tha a tih thu a sawi a. Party mipuite chu eng hna pawh thawk ila, kuttling leh rintlaka thawk turin a chah bawk.
